Parchè deso ne convien el NON VOTO

Un sistema połitico funsiona un fià come na machena. Ghe vol un motor, che xe łe istitusion, ghe vol na caroseria, che xe i teritori del stato, ghe vol un autista che xe i połitici che guida ła machena. Ma sensa benxina sta machena no ła va vanti. Quala xeła ła benxina de un sistema połitico democratico?
Ła xe ła fiducia deła xente.
E come se misura ła fiducia deła xente, in un sistema democratico?
Col voto.
Cosa succede da naltri? Vivemo in un sistema democratico?
Dirìa che soło i pì sprovedui pol pensarlo. Basta che femo mente local al numero de referenda aprovai dała xente e scancełai co na lege-trufa el dì dopo dai politici (finansiamento ai partiti, ministero del’agricoltura, privatixasion deła rai e vanti cusì). Sensa pensar a tante altre robe senpre pì evidenti a tuti.
Eco ałora che dovarìa esar ciaro a tuti che NO vivemo inte un sistema democratico.
Questo xe vero nei fati, ma no podarà mai esar meso nero su bianco finché ła machena democratica continua a ndar vanti. Val a dir finché che butemo rento benxina. Finché daremo a votar dandoghe fiducia al sistema trucà.
Eco parché almanco na volta dovemo farghe inpisar el segnal de riserva al prexunto sistema democratico. E xe inportante che sto segnal parte proprio dała casaforte eletoral preferìa dal sistema partitocratrico: el Veneto.
Eco parché xe inportante stavolta no ndar votar, parché ghe xe łe precondision par far inpisar sto segnal de riserva ała machina trucada del sistema politico tałian.
Ocio che questo no vol dir risolvar i nostri problemi, che i restarà tuti conpagni a prima dopo el voto. Ma almanco vol dir sbasar el liveło iluxionista deła politica tałiana, che deso ne confonde e ingana. Vol dir scumisiar a far un fià pì de ciaro. E pò dopo provar a far partir na vera machena democratica e che inquine de manco 🙂

Bona Pascua a tuti!

Gianluca Busato
Partito Nasional Veneto

written by

The author didn‘t add any Information to his profile yet.
Related Posts

Comments are closed.

Leave a Reply

Want to join the discussion?
Feel free to contribute!