Ła linea połitica del PNV: independensa, in forma pasifica e democratica

Nei ultimi tenpi pì de qualchedun gà espresso dubi suła posibiłità de otegner l’independensa veneta par mexo de un proceso politico come queło individuà dal Partito Nasional Veneto, a cauxa del’inpedimento da parte deła costitusion tałiana.

Par far ciaro de sti dubi, penso sipia utiłe portar qualche breve riflesion.

Ła prima riflesion xe che un independentista veneto no gà da farse intimorir dała costitusion tałiana,

Al momento £a linea proposta dal PNV – anca parché nisuni che mi sapie gà fin deso proposto alternative valide, che co łe vegnarà proposte podarà eventualmente esar examinae – xe queła de rifarse ai percorsi individuai dai grandi partiti independentisti democratici e nonviolenti europei e mondiali che se propone de indir un referendum de autodeterminasion e che individua nel masimo organo istitusional raprexentativo dei veneti (el presidente del’Ente Regione del Veneto) che ancuò exista l’agente che posa autorevolmente indirlo, in seguito al’otenimento de un spesifico mandato popołar par farlo.

Sarà eventualmente responsabiłità del’itałia negarne el dirito al’autodeterminasion e asumersene le responsabilità połitiche, prima tra tute la non oservansa dei tratati che a gà sotoscrito par far parte dela comunità internasionałe, oltreché porse in contrapoxision no tanto co un burocrate come n’altro che pol esar el governator del’Ente regional del Veneto, quanto dela popolasion che gavarà votà un serto programa e obietivo połitico apunto.

Gò qualche serio dubio che un stato osidentałe posa inpedir de fato un referendum de autodeterminasion, gnanca ła Serbia xe riusìa a inpedir al Montenegro de farlo e naltri ghemo qualche strumento democratico in pì dei montenegrini, par fortuna.

Par conpletesa d’informasion, ła costitusion taliana stesa al’articoło 2 riconose (e donca logicamente ghe ne amete ła preexistensa e la superiorità fiłoxofica e giuridica) e garantise i diriti inviołabiłi del’omo: tra questi l’autodeterminasion.
Senpre par conpletesa, no ghe xe stato al mondo che riconosa el dirito de autodeterminasion in modo esplicito (ghe xe soło el Canada che ło contenpla come posibiłità, sensa riconosarlo ciaramente, e na volta, paradosalmente, ghe gera l’URSS comunista), ma sto aspeto no gà inpedìo ła formasion de un gran numaro de novi stati, proprio grasie al’autodeterminasion !!! Deła serie, i popołi pol libararse, se i lo vol, ma i so cołonixatori no i xe cusì idioti da darghe i manuałi e łe istrusion operative sul come farlo :- )

El steso articolo 5 deła costitusion tałiana no dixe in modo esplicito che ła republica xe una e indivixibiłe, ma ło dixe in incixo, dando pì spasio logico ałe autonomie locałi che al’unità e indivixibiłità.

A ogni modo xe evidente che xe pì fasiłe otegner l’independensa rispeto a altre forme de autonomia, o federałismo, parché ne basta manco de 2 milioni de voti par otegnerla, in rafronto ai 2/3 del parlamento colonial tałian che ne conceda forme de autonomia, opur a metà del parlamento pì 25 milioni de voti che la conferma par mexo de un referendum. Xe donca evidente che 2 xe pì picenin de 25 !!

In concluxion mi son convinto che l’independensa se gà da torsela – democraticamente e pasificamente – e no spetar che i altri i ne la daga par gentile concesion :- )

Gianluca Busato
segretario nasional PNV

written by

The author didn‘t add any Information to his profile yet.
Related Posts

Comments are closed.

Leave a Reply

Want to join the discussion?
Feel free to contribute!