headermask image

header image

ECONOMIE INDIPENDENTI

In te’l 1945 ghe xera 74 nasioni indipendenti. Ancó gh’in’è 195 (192 iscrite ałe Nasion Unìe, pì el Vatican, Taiwan e el Kosovo). Na domanda spontanea ła xe: parké se forma nóvi stati? In fin dei conti i confini połitisi no i xe obligatori cofà mari e monti, ma creà da esari omàni. Sta domanda de confini otimałi se ła ga senpre posta dai fiłoxofi de l’antighetà ai economisti de Harvard al di de ancó.

Aristotełe el sosteneva ke i confini ideałi i ciapava rento tuti kei ca se conoseva de parsona. Platone adiritura el xera rivà a on numaro: 5040 cai de fameja. Sti greghi antighi i vivéa in te on periodo de sità-stato, ma La Połitega de Aristotełe ła ne insegna ncora: “l’esperiensa ne dimostra ke a xe fadiga, se non inposibiłe, ke no stato masa grando el sipia governà da bone lexi.” Sto prinsipio no’l xe ndà perso inte i secołi, e ancó łe stese domande łe fa, in articołi academisi, economisti de Harvard e profesori de altre oniversità de fama mondial (*): ghe xeła na ragion economega da drio sta moltiplicasion de nasion?

…[l’articolo continua soto le cartine]… l’Europa inte’l 1500

[l’Europa inte’l 1500 – free trade]

l’Europa inte’l 2000

[l’Europa inte la fine 1800 – protectionism]

l’Europa inte’l 1900 [l’Europa inte’l 2000 – free trade]

In te łe cartine de l’Europa se nota ke in te’l Rinasimento ghe xera na fraca de stati. L’Irlanda, ła Dhermania e ła penixoła Italega łe xera variopinte da on mucio de nasion. On contrasto alusinante co l’Europa de fine Otosento: Inpero Otoman, Inpero Ruso, Inpero Dherman, Inpero Austro-Ongarico, Inpero Britanego, Regno Talian. I ùnisi stati picenini ke i se ga salvà i xera in te ła costa Atlantega (Portogało, Belgio, Olanda, Danimarca), e par on bon motivo: i gavea cołonie in volta pa’l mondo.

La fine de l’Otosento xe sta on periodo caraterixà da protesionismo economego. Poki scanbi comerciałi, e i poki ke ghe xera, i pativa tarife dixomàne. Studi econometrisi i ne conferma ke ghe xe na forte corełasion fra comerso internasionałe e el numaro de stati: pì free-trade ghe xe, pì alti i incentivi de disgregasion połìtega. Difati, soto regime de free trade, na dita de no stato picenin ła pol vendar in tuto el mondo. Ma soto regime protesionista, i confini del stato i xe i confini del marcà. Eco lora ke stati i taca fagocitar altri stati parké in fin de i conti serviva a slargar el propio marcà. Se no te poi comerciàr co l’estero, a na dita ghe convien star rento on inpero invese ke na sità-stato.

Grasie al comerso lìbaro, in te’l Rinasimento sità cofà Venesia e Amsterdam łe xera potense economeghe pi forti de Spagna e Francia. Invese durante el protesionismo del Otosento, Mazzini el postuła ke el numaro ideal de stati europei el xe dódaxe (Siciliani, Bretoni Galexi, Irlandexi, el dixe, i ga on marcà masa cèo par esar indipendenti). El Dictionaire Politique del 1843 scrive ke Belgio e Portogało i xe ridicołi cofà nasioni indipendenti. Adiritura, in te’l 1897 el primo ministro inglexe el ghe dixe a l’anbasador francexe: “se voialtri no fusi cusì protesionisti, nialtri no gavarisimo da invader novi teritori”.

In concluxion, łe dimension de no stato łe xe el rixultà de on ecuilibrio. In te on mondo bełicoxo e co poco comerso, convien far parte de on inpero. Pi xente ghe xe, pi groso l’exercito par difendarse e pi grando el comerso domestego. Donca łe federasioni łe salta fora par na necesità de agregarse par far fronte a on nemigo foresto (e mai par decentrałixar, come ke in ne vol far crédare co ła carotina de l’autonomia e del federałismo). I cantoni sguìsari i se ga confederà par sto motivo. łe cołonie mericane pena dopo l’indipendensa del 1776 łe gavea formà na confederasion de stati in pratica indipendenti. Ma diexe ani dopo par far fronte a spagnołi, francexi e inglexi i ga formà na federasion pi centrałixà. Anca l’altipian de Axiago, el se ga confederà par far fronte ai trentini, e pi vanti i xe intrà da so posta in te ła Repiovega Veneta par far fronte ai striaki.

Ancó, in te on periodo de paxe e globałixasion comerciałe, se spiega parké i sèvita saltar fora novi stati indipendenti (Rep. Ceca, e Slovakia, Lituania, Estonia, Letonia, Armenia, Georgia, Moldavia, Slovenia, Croasia, Montenegro). In te na economia globałe se xe pì conpetitivi co stati cei, parké i xe pì eficenti. No xe on caxo ke dei sincue stati pi grandi del mondo (Cina, India, USA, Indonexia e Braxiłe) soło i Stati Unìi i xe riki, staltri i ga miliardi de parsone ke i vive in povertà. Vardando i diexe stati pi riki (in Pil pro capite) soło cuatro i ga na popołasion ke supera el milion (USA, Sguìsara, Norvegia e Singapore), staltri stati pi riki al mondo i ga tuti manco de on milion de popołasion. El stato African co pi alto taso de crésita el xe el Botswana (popołasion: 1 milion). E in Europa, ke stato gało el taso de crésita pi alto? Malta.

E l’Italia, gała dełe dimension eficenti par far fronte a l’economia globałe? L’Italia ła ga na popołasion exageratamente sora ła media. 89 stati de sto mondo (cuaxi ła metà) i ga na popołasion inferiore ai 5 milioni. Parfin na Venetia indipendente (co na popołasion de 7-8 milioni) ła gavaria na dimension al de sora deła mediana. Ke senso gało pì el contenidor Italia in te’l contesto Europeo de ancó? Par ła difexa gavemo ła NATO, par l’economia gavemo l’Euro, e par custion legałi e altro gavemo l’Union Europea. Par cosa ne serveła l’Italia, e cuanto ła ne costa? Forse far parte de on pastrocio demografego ne va ben par vinsar łe cope del mondo. Ma in Pil pro capite, ancó ne sorpasa ła Spagna, ma parecémose parké doman ne sorpasa ła Slovenia, ła Lituania e el Montenegro.

Lodovico Pizzati, Washington D.C. (USA)
Coordinator Comision Economia del PNV

(*) Dati e citasion tolti da “The Size of Nations” de Alberto Alesina e Enrico Spolaore, MIT Press, 2003.

If you liked my post, feel free to subscribe to my rss feeds