Je suis desolé Madame Mocenigo, mais Venise est de Milan

Ne róxega co ke in TV se vede el stereotipo veneto de serviłità, ma in parte xe vero ke i veneti i xe bonbi fin l’oso de suditansa. Da do secołi semo sta bituà a pensar ke łe nostre decixion połiteghe łe ga senpre da torle staltri. Soto el taco dei francexi, soto el comando dei striaci, soto el regime partitocratego talian. El milenio de indipendensa veneta, metodicamente censurà dai libri de scóła, el pararia ramai scansełà dal DNA veneto.
Na risposta ałe raixe de sta sotomision patoca ła go catà inte on libro ke go pena finìo de lexar (Lucia, A venetian Life in the Age of Napoleon – Andrea di Robilant, Alfred A. Knopf, New York, 2008, 350 pp): ła xe na biografia romanxà baxà sui diari e scanbi epistołari de Lucia Mocenigo, patrisia venesiana visùa durante ła fine deła Serenisima e testimone del dominio napołeonego e striaco. Grasie al so rexoconto personałe, scoverto ntei documenti de fameja de Robilant (disendente direto de Lucia), ancó podemo revegnir on dei capitołi pì sfortunà deła nostra storia. Na version veneta del pasagio da popoło indipendente a subordinasion soto na serie de capitałi foreste: Parigi, Viena, e Milan.
Me ga sorprexo lexar ła parte del 1814 pena dopo ła fine de Napołeon, co ke l’Europa ła se pareciava pa’l Congreso de Viena par ripristinar i veci ecuiłibri geopołitici. Lucia, ke ła xera a Parigi par tendar i studi de so fioło, ła sperava pa’l futuro deła Venetia. Ła se domandava k se i ga ripristinà el vecio governo in Francia, parké no anca ła Republica Veneta? Ła Mocenigo ła ga spesegà co łe so conosense venesiane par firmar na petision par “ła rinasita deła Republica” come ke i ga fato anca i genovexi. Ła ga anca fato domanda par parlar co l’inperator austriaco (al momento a Parigi), e el 24 Majo 1814 ghe vien conceso na vixita a Keco II. Ma par cuanto ła inplori de far de Venesia almanco na capital teritoriałe al posto de Milan, o ła rexidensa oficiałe de l’arciduca asburgico, łu no ghe risponde altro ke “ła staga kieta Madame, no ła se preocupi.”
Ghe vien anca conceso on petit quart d’heure d’entretien col prinsipe Charles Maurice de Talleyrand, ministro dei esteri francexe. Almanco forse ła podea farse ridàr tuti i documenti ke Napołeon el gavéa robà a Venesia, e ke eła ła xera sta bona de catar fora in tei arkivi de Parigi.

Talleyrand: Ah, ma co ke Venesia e Milan łe xe sta unìe [in te’l Royaume d’Italie] i documenti i xe stà destinà a Milan.
Lucia: Monsieur, a li go visti in tei arkivi ki a Parigi.
Talleyrand: Beh, i xe soło in consegna.
Lucia: Ma i xe ki…
Talleyrand: In consegna…
Lucia: Ma almanco no se pol mia far na petision par ritirar sti documenti?
Talleyrand: I xe de Milan, e sicome ke i xe ki soło in consegna no xe propi posibiłe. Deso Milan ła xe de Viena.
Lucia: Ałora in caxo se ga da far domanda a Viena?
Talleyrand: Tuto a Viena…

Cuel ke me ga colpìo co ke go leto sto diałogo a xe l’atuałità de sta sotomision połìtega. Napołeon el ga fato Milan ła nostra nova capitałe, e nte’l mexo secoło sucesivo l’Austria ła ga cristałixà col Lonbardo-Veneto sto novo punto de riferimento. E dopo miłe ani de indipendensa, in do secołi i veneti i se ga ben abituà a ciapar ordini da fora. In fin dei conti el 60% dei veneti el vota par n’ase partitocratega miłanexe. No gavemo mia in man el nostro futuro. Vołemo manco presion fiscałe? Vołemo (o no) na nova baxe miłitare a Vicensa? Vołemo el federałismo? No vołemo mia łe scoàse napołetane? No łe xe mia decixion nostre, e no ne resta altro ke sperar in te ła clemensa dei nostri paroni insubri.
Lexendo ła biografia de Lucia ne vien na scianta de małinconia. Se resta stravià dała dolsesa e vitałità de sta dama venesiana, ma ne rimane on retrogusto amaro pa’l declino storico ke fa da sotofondo. Lucia ła ne conta come ke gavemo perso ła nostra indipendensa, e se spiega parké da doxento ani semo sucubi deła storia invese ke responsabiłi deła nostra sorte. Ancó, tanto cuanto ai tenpi de Lucia, no semo pì paroni del nostro futuro.
Ricordémose ke el colpevołe de sta suditansa no ła xe mia na prepotensa foresta, ma ła xe ła nostra inersia. Ai tenpi de Lucia xe mancà na spina dorsałe veneta par sotoscrivar na petision par ła rinasita de na Venetia indipendente. Ancó gavìmo da domandarse par cosa se tirémo indrio: “tanto no serve a gninte”, “l’Internet no me funsiona”, “vardo masa tełevixion”. Łe scuxe łe pol esar tante, ma soto ghe xe na naturałe fifa de esporse (“no se sa mai…”) e anca na conprensibiłe mancansa de identità veneta (“no son mia mona mi”). Ma ancó el costo de star lì inpanpałà el se ga fato masa grando. Ełora forsa e corajo: firmè e fè girar sta petision.

Lodovico Pizzati
Partito Nasional Veneto

written by

The author didn‘t add any Information to his profile yet.
Related Posts

Comments are closed.

Leave a Reply

Want to join the discussion?
Feel free to contribute!