Viołense tałiane sui turisti foresti, el Veneto ciape łe distanse: “EL VENETO NOL XE ITALIA”

I gravisimi fati de viołensa e stupri che gà colpìo un fraco de pori foresti in Itałia par turixmo danegia l’imagine del Veneto. Scumisiemo anca qua na canpagna de comunicasion come queła sudtirołexe

Venesia, 27 agosto 2008

Sta setimana de fine agosto xe stada caraterixada da epixodi de cronaca viołenta de na gravità enorme nel visin teritorio tałian.
I fati de viołensa no xe de sicuro na novità in sé, quel che parò xe emerso co evidensa xe che i turisti foresti europei e del tuto mondo co i vien in Italia no i pol star tranquiłi e che par ła prima volta i sindaci del posto i gà dato par scontà che ste viołense łe pol sucedar e che no xe da farsene maraveja.
Eco che traspare co forsa un sistema giudisiario che ghe permate ai criminali de far reati sensa ris-ciar gnente.
Criminałi foresti, come nel caxo de Roma, ma anca criminałi tałiani, come inte’l caxo de Tore Anunsiata (visin Napołi). Sta xente ła pol far queło che ła vol, tanto ghe xe scarsa probabilità che i li ciape e anca se i li ciapa, o i li moła subito, opur i se fa 2-3 ani de prixon, sfrutando premi, sconti, evaxion, indulti, par dopo tornar a far viołense pì rabioxi e sfrontai de prima.
Eco parché el sindaco post-fasista de Roma e queło post-comunista de Tore Anunsiata i se gà catà d’acordo nel dir che ła colpa gera dei turisti, che i doveva star pì atenti, insoma. Sti pori turisti foresti evidentemente no i gera stai informai che i se catava soło che aministrativamente in Europa, parché in realtà i gera in Africa, o in Sud-America, forse.
Fin qua uno dirìa che semo drio parlar de notisie de cronaca foresta, che no ne riguarda come veneti. E pol anca esar vero, se no fuse che sti episodi ne ciapa in pien anca naltri, come quei dełe scoase de Napoli de qualche mexe fa. El nostro turixmo, che’l xe na specie de petrolio pal Veneto, ghe ne sofre un mucio, pa far un exenpio. Ma xe tuta l’imagine nasionałe veneta a sofrir de sta situasion, dal comercio ała siensa, dała cultura al’anbiente, dała produsion ała politica energetica.
Se altrove i se cata ben a definirse tałiani e no i capise ancora che el problema se ciama proprio Italia, co łe so iresponsabiłità storiche e i se incontenta de na medalieta ałe Olinpiadi (speso ciapada proprio dai veneti), o de na vitoria ai canpionati mondiali de bałon (coi goal dei veneti Baggio e Del Piero, magari), naltri dovemo capir che xe pì i dani che i benefici a esar confuxi co l’Italia. Anca el Veneto xe infati senpre de pì destinà a esar etichetà come paexe deła mafia e deła viołensa, parché nol riese a rancurarse na so precixa identificasion come Veneto, come Nasion a sé stante.
Eco parché el Partito Nasional Veneto, ciapando ispirasion dai amisi sud-tirołexi, gà decixo de scumisiar a tacar cartełi al confin del Veneto, che spieghe par ben che

“EL VENETO NOL XE ITALIA”

L’aspeto poxitivo de sta degenerasion de viołensa xe che sta situasion ne farà ciapar cosiensa in presia che soło che l’independensa pol salvarne.
El Veneto indipendente non permetarà infati ai violenti el protrarse de na situasion de ciara inpunità e de incertesa deła pena, ansi deła sicuresa, o squaxi de pasarla lisia.
El Veneto independente, inoltre, controłarà le so frontiere anca co l’auxilio de nove tecnologie de locałixasion, come che gà fato, par exenpio, la Slovenia co ła xe entrada a far parte del’area Schengen.

Partito Nasional Veneto
Web: www.pnveneto.org

written by

The author didn‘t add any Information to his profile yet.
Related Posts