headermask image

header image

Inpegnemose par le nostre sità, libare e indipendenti

Cari fradei Veneti,

semo tuti consapevołi de un difisiłe momento che stemo vivendo da un ponto de vista economico e połitico.
Qualche mexe fa i Veneti i se gà espreso ałe elesion połitiche dando carta bianca par canbiar ła situasion.
Ne gera sta promeso che deso łe robe le sarìa canbiae, visto che ghe gera ła forsa połitica e i voti par canbiar. Xe pasà pochi mexi, ma de sti canbiamenti no gavemo visto gnanca l’onbra.
Ansi, gavemo visto che xe sta dati ancora i nostri schei a sità in bancarota, come Roma e Catania.
1.500 miliardi de vecie lire, tanto par piaxer. 30 miliardi de lire de stipendio a Fantozzi (un cognome na garansia), par far da pasacarte par qualche mexe sul cadavere de Alitalia. E vanti cusì.

El fato che ormai xe ciaro a tanti xe che łe robe no łe pol canbiar pasando par Roma.

Cosa vołemo far donca, star a vardar intanto che i ne continua a robar łe nostre risorse e a distrugiarne ogni speransa pal nostro futuro? Abandonarse al fatałixmo del “tanto no canbia gnente”, del “tanto tuto xe perso”? Xe cusì che ghe femo onor ai nostri veci e che ghe insegnemo ai nostri fioi?

Naltri pensemo che se posa far altrimenti. Che naltri Veneti a ghemo tute łe carte in regola par far da naltri sołi, par cavarse dala tuteła tałiana che ła xe ineficiente e ła serve soło che par robarne el posibiłe.
De fianco a naltri ghemo ła Slovenia e l’Austria che ormai łe ne fa na concorensa tremenda.
El Veneto e ła Lombardia orientałe łe xe ormai sfibrae da sta situasion insostenibiłe, ma anca el Friuli-Venesia Giulia e el Trentin no i se ła vede tanto ben. Praticamente a ghe xe łe condision ideałi par ricrear un tesuto połitico novo sul teritorio che gera deła glorioxa Republica Serenesima de Venesia e che deso tanti riconose come ła Venetia.

Fra pochi mexe se tien łe elesion aministrative, comunałi e provinciałi.

Ale elesion no sarà prexente diretamente el sinbolo del Pnv, se non in caxi ecesionałi. Questo parché come partito ritegnemo de far un paso indrìo, par evitar che ła prexensa de un sinboło schierà posa inibir qualcuni a dar el so prexioso contributo.

Preferimo invese che se cree sul teritorio na rete de liste civiche de ispirasion indipendentista e verte al’aporto dełe citadinanse, el pì estexa posibiłe.

La to Sità Libera e Indipendente

Ve domandemo donca de sostegner un sinboło neutro, che gà ła folia de tilio de sora, parché sta pianta da senpre contradistingue l’inpegno civico dei Veneti, dei Furlani, dei Giuliani, dei Bresani, dei Bergamaschi, dei Trentini, dei Triestini, visto che gera proprio soto el Tilio che i nostri veci i se catava par desidar del destin dełe so comunità. Ognun paron a caxa soa, sensa partiti che deta ordini.

Faxemo un apeło, in particolar ai pì xovani, ai studenti e ai neo-laureati, de inpegnarse in sto progeto de rinasimento civico dela nostra sità.

Dè la Vostra disponibilità a corar nełe liste nel vostro comun. Contatene, ghe ne xe de bixogno. Ogni aiuto el val pì del’oro.

Come Pnv – in cołaborasion con altri volontari che i condivide ła nostra preocupasion par ła perdita de senso civico – stemo pareciando anca dełe scołe de formasion połitica par inparar insieme come che funsiona ła vita aministrativa.

Soło inpegnandose in prima persona podemo pensar de canbiar el nostro destin, i Veneti no i gà mai łasà che el “fato” ciapase el sopravento sensa che lori no i gavese dato tuto queo che i podeva dar, in cosiensa.

Grasie par queło che podarè far,

Gianluca Busato


If you liked my post, feel free to subscribe to my rss feeds