Indipendenza xe pi laoro

Pultròpo recesión vol dir pì dixocupasión. Ogni dì se vien a saver de senpre pì xente, amighi o conosense, ke ga perso el laoro. Par no parlar dei xoveni ke i fa fadiga catar anca el primo laoro. TV e xornałi ne spiega de ła crixi mondiałe, e dełe dinamike de na potensiałe depresion mondiałe. Ma a noialtri veneti, ke vivemo in te on teritorio baxà sol export, ste robe łe sentìmo so ła nostra pełe, prima ke se ne acorxa i economisti.

Xe vero, tante dite łe toca sarar o mandar caxa na fraca de xente parvia de ła conpetision cinexe, deła recesion mondiałe, e de tute staltre ragioni macro economeghe. Pararìa cuaxi ke l’oprimente contenitor Italia sta olta el centri poco. Ma l’esperiensa de on amigo ne rivela el contrario.

Sto inprenditor el ga na dita ke và, anca durante sta crixi. El gà tanto laoro, e no’l ga problemi de vendite. Epure, st’ano ke vien el ga decixo de sarar tuto. El xe stufo e straco. El so problema el xe difarente. Data ła globałixasion el se ga acorto ke par star al paso co ła conpetision internasional ghe tocava ingrandirse. Se no’l se slarga no’l pol star al paso.

Eco, pitosto de slargarse el preferise sarar botega. No xe ke no’l vol dar laoro a pì xente o investir so ła so dita, ma el sistema talian ghe ło rende inposibiłe. Sofegando łe nostre dite co tase, regołamenti, e gymkane burocrateghe, i ne obliga a sarar fabrica.

A sto punto el deventa inperativo scorlarse el parasita de doso. L’indipendensa deventa on fato de vita o de morte economica. Vołemo l’indipendensa par poder incentivar łe nostre dite a inpiegar xente. Vołemo l’indipendensa par poder investir in novi setori tenołogici. Vołemo l’indipendensa parké vołemo far skei e star ben (e no ghe xe gninte de małe).

Cavémose sta bała al pie, parké na ‘olta lìbari da sta opresion fiscałe e burocratega, takemo pedałar da novo, e co ojo de gunbio riciapemo tuti, anca i cinexi.

Lodovico Pizzati e Claudio Ghiotto

written by

The author didn‘t add any Information to his profile yet.
Related Posts

Comments are closed.

Leave a Reply

Want to join the discussion?
Feel free to contribute!