Pnv, un partito patriotico: iscrivate se te vol la to libartà e quela dei to fioi

Cari amisi, el Pnv, el Partito Nasional Veneto, el xe nato da pochi mexi (18 de magio 2008, par ła precixion), ma xà el xe na prexensa de spesor asołuto nel panorama połitico Veneto.
Semo cresui un mucio come proposte programatiche e come capasità de informasion sui novi media.
Stemo cresendo come grupi teritoriałi, se stemo ativando anca per łe prosime elesion aministrative.
In poco tenpo ghemo insoma bruxà łe tape.
Eco parché meritemo fiducia.
Molti ne varda dixendo che semo solo che n’altro partito.
Invese naltri no semo el solito partito de poter.
No.
Naltri semo un partito patriotico.
Un partito che nase co un solo obietivo: l’indipendensa deła Venetia.
E par otegnerla ghemo individuà un percorso che par ła prima volta un partito deside de percorar.
Overo otegner el mandato dai Veneti par indir un referendum par ła nostra indipendensa.
Ghemo bixogno de ti che te ne lexi.
Ghemo bixogno che te te iscrivi al primo partito patriotico veneto.
Se te ne iuti, te te iuti e insieme podemo far queo che i gà fato in Montenegro, in Quebec, in Groenlandia e che deso i fa anca in Scosia.
Podemo esar libari e indipendenti nela nostra tera, finalmente paroni del nostro destin e sensa pì łe cadene dei połitici tałiani che ne tien soto tuteła.
Naltri Veneti semo conosui in tuto el mondo par el nostro vałor e par ła nostra onestà. Semo solo che naltri Veneti che dovemo convinsarse del tuto deła nostra capasità.
Se no te iuti el Pnv, nesuni organixarà el referendum par l’indipendensa del Veneto, parché nisuni altri ło gà come obietivo.

Vutu el referendum? Vutu l’indipendensa?
Alora iscrivate al Pnv! Iscrivate deso!

Gianluca Busato
Segretario Partito Nasional Veneto

written by

The author didn‘t add any Information to his profile yet.
Related Posts