Dr. Doom (Dotor Rovina)

dr-doom

Dr. Doom (Dotor Rovina)

El Sole24ore riporta na intervista al noto economista Nouriel Roubini so la situasion economica taliana (articoło). Noto par ver previsto crołi finansiari come in Axia ntel 1997, sto prof. de New York University el xe drio puntar el mirin verso l’Italia.

El dixe ke se l’Italia no fa dełe riforme struturałi el problema deficit/debito portarà verso dei problemi “significativi.” El xe vago (e sto so stiłe el xe sta criticà da altri economisti), e el risponde ke no vol dir ke l’Italia ła ndarà fora da l’euro (nisuni ghe ło gavéa domandà).

gdp-growth-world-usa-eu-ita

La situasion taliana ła xe efetivamente ła pexo a liveło mondiałe. Come ke xe riportà su sta tabeła (dati IMF), l’Italia xe l’unico paexe co tre ani de fiła de recesion (ciamemoła pure depresion).

No ocor esar Nouriel Roubini par predir ke se ghe xe on paexe prosimo al scioco a xe el pì moribondo deła conpagnia. Podemo anca sparagnarse łe predike ke ghe vol riforme.

Ło sa anca on puteło ke sensa riforme no se pol narghe fora. Tanti economisti te sa dir ke tipo de riforme ke ghe vołe, ma i resta tuti inocà co ke te ghe dimandi ła fatibiłità a liveło połitego.

El problema xe apunto ke far riforme conporta sacrificar el clientelismo e ła piramide de favori ke se ga indarentà rento sto esperimento risorgimentałe.

Spetarse ke el parasita el se suicidi par el bene de l’organismo a xe insulso. No se pol descatejar on gropo masa intorcołà. Se ga da darghe on tajo.

L’unica posibiłe riforma xe l’indipendensa, dei veneti, dei sardi, dei siciłiani, dei toscani e conpagnia beła. Ma par otegner sta riforma no se pol star in poltrona e spetar co suditansa ca el parasita el fasa i nostri interesi.

Gavemo da conportarse da citadini e darse da far ativamente par el nostro dirito a on futuro fełice e prospero. No ne regała gninte nisuni.

Lodovico Pizzati
PNV

written by

The author didn‘t add any Information to his profile yet.
Related Posts

Comments are closed.

Leave a Reply

Want to join the discussion?
Feel free to contribute!