L’INDIPENDENSA LA XE ON BEN PAI PI POARETI

indipendensa-un-ben-par-i-poareti

Gnanca diexe ani fa ła Banca Mondiałe ła ga publicà sto articoło academico: Growth is Good for the Poor (La crésita ła xe on ben pai pi poareti). Al tenpo tuti i parlava de l’inpato de ła globałixasion, e tanti i se domandava ke efeto el gavése su i pì poareti menbri deła socetà.

Ła fifa ła xera ke co pì comercio avantagiase soło ke na parte deła popołasion, e marginałixando ncora de pì i sitadìni pì poareti del paexe. Sta riserca soracità ła xe servìa a smontar sto mito grasie a na anałixi econometrica baxà su dati da 92 paexi, par 4 deceni.

I autori i ga catà na forte evidensa ke el redito medio dei pì poareti el creséva in proporsion co el redito medio del paexe. Sta scoverta ła xera statisticamente vera no inporta el continente, el periodo storico, el benesere o ła cresita del paexe. Ła cresita generałe de sicuro ła da beneficio anca a i pi poaréti.

Sta ultima decade ła ga anca visto nantro toco de riserca economica ke studia nantro inpato deła globałixasion: podaria esar ke co el comercio lìbaro i stati pì cèi i ga na połitega pì eficente, i xe pì conpetitivi nte’l marcà globałe, e i vive on taso de crésita pì alto?

Diversi articołi academici i ga sostegnù sto punto. Par exenpio, sto ki el xe n’articoło enpirico scrito da profesori de economia de Harvard, Stanford e Brown University, e piovegà ntel 2000 da l’American Economic Review: Economic Integration and Political Disintegration (Integrasion Economica e Dixintegrasion Połitega).

El ragionamento dixe ke dato ke i paexi pì cèi i xe (forse par necesità) pì verti al comercio, e el comercio el xe ligà fiso co ła crésita, ałora łe economie pì picenine łe dovaria fiorir in te na economia globałe.

Sto ki xe de sicuro el caxo. Forse parvia ke na połitica publica in paexi pì cèi ła xe pì in sintonia co łe exigense dei so citadini, e in sta maniera se crea pì benesere economico.

Vardando l’evidensa enpirica da sti do toki de riserca, na domanda banałe ła vien spontanea: i paexi pì cèi xełi mejo a ridur ła povertà? A intuisión 1+1=2, ma servirìa no studio economico specifico par dar na risposta definitiva.

Sta ki ła xe na domanda ke ła pol esar estexa oltre ła distribution de redito e a altri indicatori sociałi. I paexi pì cèi xełi drio proveder mejo sanità, mejo istrusion, mejo risorse par ła siensa e ła tenołogia, e mejo welfare?

Almanco par l’Europa i dati i xe disponibiłi su Eurostat spetando de vegner anałixà. E se xe propi cusì, e go el forte sospeto de si, ałora a xe ora de farse on exame de cosiensa ideołogico.

In te na Europa integrà indove el nasionałismo da disnoveximo secoło ga poco senso, i partiti połitici preocupà de giustisia sociałe no i dovaria mia esar dała parte dei Scosexi, dei Catałani, dei Fiaminghi, dei Veneti e dei Sardi?

Par exenpio, no xe mia poco anacronistico ke el partito de centro-sanca talian el xe el pì fedełe co fervor ai confini połitici stabiłìi durante l’espansionismo del disnoveximo secoło? Xe ironico ma el contentitor talian, de dimensioni ineficenti data l’integrasion europea, ła xe ła pì scandałoxa trapoła de povertà.

Spunto de meditasion intanto ke ła recesion del 2009 ła se fà pì grave: i poareti, i dixocupà, i pensionà i ga on gran bixogno de na asion połitega coragioxa.

Lodovico Pizzati
Partito Nasional Veneto

Link al’articolo in inglexe

written by

The author didn‘t add any Information to his profile yet.
Related Posts

Comments are closed.

Leave a Reply

Want to join the discussion?
Feel free to contribute!