PLEBISCITO.EU | PNV. Press News Veneto

Taca el viagio del Pnv inte le province che va al voto

Par sta canpagna eletoral ghemo pensà a un modo diverso de far połitica. Ghe sarà ancora convegni ed eventi inportanti, ma ghemo pensà de crear dei apuntamenti itineranti pì senplici e ała man.

Prima de sena, ałe dałe 19.15 in vanti se catemo par conosarse e ciacołar apunto de połitica e spiegar el troxo concreto par l’independensa. Se dopo ghemo voja e i argomenti se fa interesanti co chi che gà piaser se fermemo a sena a magnarse un bocon.
Ormai xe ciaro a tuti che cusì łe robe no łe połe ndar vanti, ma gnanca se pol lamentarse e basta.
Se gà da far qualcosa, naltri Veneti co piove dal teto no semo abituai a metar un secio par tera, ma ndemo a sistemar el coerto.
Ben, vołemo o no ałora ndar a sistemar el coerto anca deso?
L’unico modo ragionevołe e moderà che ghemo xe de ciaparse in man el cuor e scumisiar a desidar naltri legitimamente el nostro destin.
I ignoranti połitisi tałiani no i xe boni da gnente fora che de magnarme schei, i xe tuti conpagni e d’acordo, nisun partito se cava fora. Gnanca quei su cui pur tanti i gavea na speransa i xe pì recuperabiłi, ormai i gà inparà el mestier e i xe persi.
Eco che dovemo darse da far. Dovemo riscumisiar a credarghe, parché basta che ghe credemo e inte sto vodo połitico i veneti i capirà chi che xe na persona par ben e chi che xe un cancaraso.
Ła nostra independensa ła xe ła porta verta suła nostra fełisità.
Basta vołerla. Basta credarghe.
Coi ciari de luna che ghe xe ne basta veramente poco.
Ła strada ła savemo, bastarà organixar un referendum pa l’independensa e crear na nova clase dirigente. Łe prosime elesion regionai łe sarà fondamentai, ma prima de ałora, a partir dałe prosime elesion provinciałi, dovemo riusir a metar in xogo l’unico partito independentista veneto che ghe xe, el Pnv, el Partito Nasional Veneto.
Vien scoltarne, vien iutarne. Naltri ghemo bixogno de ti, insieme ghemo bixogno del’independensa.

Eco i apuntamenti:

• Xioba 26 de marso, San Martino Buon Albergo (VR)
• Marti 31 de marso, Cadoneghe (PD)
• Mercore 1° de april, Montagnana (PD)
• Xioba 2 de april, Verona
• Marti 7 de april, Chioggia (VE)
• Mercore 8 de april, Isola della Scala (VR)
• Xioba 9 de april, Albignasego (PD)
• Mercore 15 de april, San Bonifacio (VR)
• Xioba 16 de april, Piove di Sacco (PD)
• Marti 21 de april, Jesolo (VE)
• Mercore 22 de april, Castelnuovo del Garda (VR)
• Xioba 23 de april, Portogruaro (VE)
• Marti 28 de april, San Donà di Piave (VE)
• Xioba 30 de april, Cittadella (PD)

I posti precixi i rivełaremo man man, seguine e fa pasaparoła par l’independensa!

Viva San Marco!

Gianluca Busato
Segr. Pnv
—
4 Ciacoe col Pnv, varda la mapa: