El leon ke magna el sparonson

L’indipendensa veneta par tanti ła xe na gran incognita. D’acordo ke’l stato talian el ga tante magagne e in 153 ani ne ga portà goere, emigrasion e geometri. Ma par cosa dovaria esar difarente na volta indipendenti?

Dato el vasałagio de l’atuałe clase dirigente veneta, tanti i se dimanda se na Venesia capitałe no ła sarà altro ke na picoła Roma. El Pnv fin deso se ga preocupà de indicar el percorso legałe par torse l’indipendensa, ma łe future istitusion venete łe sarà el prodoto deła nostra cultura połitega. Semo tanto difarenti dai taliani?

Mi no son mia no storego, ma anca co l’ocio da turista in volta par Venesia se se pol farse na idea de come ke i veneti i ga concepio ła połitega par pì de on milenio.

Vardève intorno, de statue ghe ne xe gran poke. Santi a parte, fa ecesion forse ła statua del generałe Colleoni a San Zanipolo. Dei 120 dogi ke gà governà Venesia par ondaxe secołi, rixalta soło do statue tacà su par pałaso dogal.

Sto ki xe el doge Francesco Foscari, responsabiłe par ver estexo ła Republica Veneta in tera ferma riunificando l’antica Venetia Regio. Ecoło lì inxenocià de fronte el leon.

francesco_foscari

Sto kive invese xe el doge Andrea Gritti, ke ga governà durante el periodo de masimo splendor rinasimental, ma anca el pì difisiłe, l’epoca fra ła Lega de Cambrai (1508) e Lepanto (1571). Anca lu in xenocio, pì picenin del sinbolo deła Republica Veneta, el Leon de San Marco.

andrea_gritti

I pì potenti statisti veneti i vien rafigurà subordinà ała Republica. I xe a servisio del popoło. El leon, oltre ke raprexentar on santo, incarna ła respublica veneta, e nisun omo el xe al de sora del bene piovego.

El paragon co łe statue fate durante el periodo talian łe xe come na sciafa ntel muxo. In canpo Manin vedemo el leon incoacià soto l’omo. El popoło come na bestcia soto ła personałità.

daniele_manin

El culmine de sta distorsion de principi ła vedemo in Riva dei Sciaoni. Ki el culto de personałità el riva al so masimo: el leon incoacià (el popoło veneto rafigurà come na bestia furibonda) soto l’Italia, e l’Italia al de soto de Vitorio Emanuele.

plebiscito-1866

Semo tuti d’acordo ke sta statua farà ła stesa fine de keła de Saddam Hussein. Ma el punto xe ke co l’anesion a ła Francia prima, a l’Austria dopo, e a l’Italia deso, xe stà inportà in tera veneta on novo conceto de stato.

L’omo (Napoleon, Keco Bepi, Vittorio Emanuele, Mussolini, Berlusconi) al de sora del stato. Sto conceto no’l fa mia parte deła nostra cultura. Co ke łe robe łe va mal ghe xe ki ke va in estaxi a l’idea de l’omo forte ke bastona, stiłe Bossi.

Ła Serenisima no ła xe mia stà costruìa grasie a na singoła personałità. Naltri no gavemo mia Cexari o Alesandri Magni. Morti łori, finìo tuto. I stati ke dura nel tenpo se baxa su istitusion sołide e no su persone al de sora dełe istitusion.

Sto ki el xe el nostro retagio storico, na republica ke ga durà 1100 ani de fiła. Par cuesto son otimista ke Venezia capitałe no ła sarà mia naltra Roma.

Lodovico Pizzati
Pnv

written by

The author didn‘t add any Information to his profile yet.
Related Posts