exp(PNV) = Venetia*(libera + indipendente)

cresita-esponensial2Ghe xe poco da far: ghe vol na crésita esponensial del Pnv.

Par ste provinciałi l’obietivo xera riusir a prexentar na lista co l’obietivo ciaro e scéto de independensa veneta. Xe stà on gran suceso.

El fato ke semo riusìi a coverxar in maniera conpleta co internet, spot tv, spot radio, e manifesti tute e do łe province dove ke se ghemo prexentà xe na ulterior vitoria.

La notisia ke i sondagi i ne dà al de sora del 1% xe n’altro inaspetato suceso, dato ke gavemo fato na canpagna ełetorałe sensa on skeo.

La prova del parké gavemo inbrocà ła strada bona ło vedaremo durante el bałotagio. Invese de sostegner da drio łe cuinte i sołiti partiti taliani, el Pnv el gà portà direto a l’ełetorato l’opsion de independensa.

Anca se sarà na fregoła de ełetorato, al bałotagio i podaria eser costreti a tor na poxision su sto tema, stiłe Rick Perry, el governator tecsàn.

Ora però, par st’ano ke vien, ghe vol na crésita esponensial, stiłe Barack Obama. Xe de inportansa vitałe otegner par la Region on presidente indipendente par tacar el percorso referendario co monitoragio internasional.

Sensa on presidente del Veneto a favor de l’independensa, ke fa da interlocutor direto (sensa intermediari taliani) co ła comunità internasional, el percorso referendario del Pnv el vegnarìa posticipà.

Xe on posticipo ca no podemo parmétarse, parké dopo el 2010 ghe xe on buxo ełetoral. El prosimo apuntamento sarìa co łe połiteghe taliane, ke el Pnv no gà e no’l pol parteciparve. Saria contro i nostri principi prexentarse par on parlamento de no stato de cui no vołemo pì far parte.

Spetar el prosimo giro de provinciałi e regionałi xe on periodo masa longo par on partito carburà da xovani e da entuxiasmo. Tórseła co calma co obietivi a longo termine xe masa on riscio: se finìse ntel paltan smarso deła partitocrasia.

Eco parké no ghe xe altra via ma na crésita esponensial del Pnv. Region 2010, Independensa 2011-2012. Xe posibiłe. Ghe xe necesità, e no se pol far de manco.

Lodovico Pizzati
Pnv

written by

The author didn‘t add any Information to his profile yet.
Related Posts