headermask image

header image

Gilbert du Motier, marquis de Lafayette

Gilbert du Motier, marquis de Lafayette

O pai mericani el General Lafayette, el xera l’eroe masimo de ła rivołusion mericana. Nato in te na fameja nobiłe de ła provincia francexe de Auvergne, co ke ga sentìo de ła cauxa mericana Lafayette el xe partìo pa’l novo mondo.

Data ła so influensa rento ła clase dirigente francexe, Lafayette el xe stà bon de asicurar aiuto finansiario e miłitare pai rivołusionari mericani contro l’inpero britanego. Xe stà na decixion individuałe, tolta sotobanco e contro ła neutrałità francexe (difati Luigi XVI lo ga meso soto aresti domiciliari pena ke xe tornà in Francia).

I storici deła rivołusion i riconose ke xe stà soło grasie a l’intervento miłitare francexe ke i mericani i xe stà boni de rivar a l’indipendensa. George Washington no ga fato altro ke scanpar e salvarse ła pełe par grosa parte de ła goera de indipendensa.

Washington xe apresà come generałe parké el xera consapevołe de ła so debołesa, e evitando de farse ciapar el ga tegnù viva ła rivołusion fin a l’arivo del suporto coordinà da Lafayette.

Xe stà Ben Franklin a racomandar a Washington de acetar l’esperiensa e l’influensa de Lafayette. Washington el ga acetà (no gavéa alternative), ma xe documentà ke ga prexentà el generałe francexe ałe so trupe co on certo inbaraso.

I francexi i xera i eterni rivałi pai anglosasoni (come on genovexe par on venesian) anca ntel novo mondo. Difati al tenpo Francia e Inghiltera i se contendeva el teritorio de l’Ohio (uficialmente soto ła Francia) e i gavéa conbatùo a sangoe fin poki ani prima.

George Washington steso, come uficiałe deła cołonia deła Virginia, el xera responsabiłe de ver copà on intiero plotone francexe durante na pacifega spedision de ricognision ntei teritori oltre i monti apalaki.

Secondo ła storiografia, Lafayette se gà prexentà ałe trupe mericane dixendo “A son ki par inparar, no par insegnar”. Ma anca se come foresto no’l gavéa on titoło, de facto ła so esperiensa profesionałe da miłitare francexe ło faxeva comandante.

Fata l’indipendensa e tornà in Francia, Lafayette ga sevità a cooperar co Thomas Jefferson par garantir raporti comerciałì fra Stati Unìi e Francia: nantro aiuto cruciałe dato ke ła neonata nasion no gavéa pì boni ligami co l’Inghiltera.

Mentre in Francia el xe stà perseguità dai Jacobins, in Usa el xe stà el primo a vegner conferìo ła citadinansa mericana onoraria. Lafayette Park xe el nome del parco de fronte ała Caxa Bianca; Lafayette College xe stà fondà in Pennsylvania ntel 1826; on monumento a Lafayette xe stà ereto a New York City; e na fraca de locałità i xe stà nominà in so onor:

Lafayette, Virginia; Lafayette, Alabama; Lafayette, California; Lafayette, Colorado; Lafayette, Georgia; Lafayette, Illinois; Lafayette, Indiana; Lafayette, Kentucky; Lafayette,, Luisiana; Lafayette, Minnesota; Lafayette, New York; Lafayette, Ohio; Lafayette, Oregon; Lafayette, Tennessee; Lafayette, Wisconsin; Lake Lafayette, Missouri; Mount Lafayette, New Hampshire.

http://en.wikipedia.org/wiki/Gilbert_du_Motier,_marquis_de_Lafayette

Lodovico Pizzati
Pnv

If you liked my post, feel free to subscribe to my rss feeds