I Fanatici del Trikolore

trikolore

I me ga voltà na mail dała lista połitega Indipendenza Veneta. Ła mail ła xe firmà Albert Gardin e par chi ca no ło sà a xe ła lista indipendentista ca gà proà presentarse ałe Europee e ca gà intension de presentarse anca ałe aministrative de Venessia.

El contenùo deła letara parlava de na manifestasion del 30 Majo de Fiamma Tricolore a Venessia, e i tentativi de abolir sta manifestasion da “ambienti estremisti” (imajino ca se riferisa ai Centri Sociali).

Indipendenza Veneta ciapa łe distanse dałe ideołogie de Fiamma Tricolore, ma difende el so dirito a manifestar, on dirito de espresion garantìo dała Costituzione (maiuscolo de Gardin, e imagino che se riferisa ała costitusion taliana).

Mi a go do comenti a sta roba:

Primo. Me và puìto difender ła libartà de espresion (noto ca xe stà sotolineà anca rento el spot del Pnv), ma a ghe xe anca el dirito ała contro-manifestasion. Me vien in mente come ca se vede in tełevision łe manifestasion naziste fate in America. Na ventina de neo-nazi ca sfila, doxento połisioti ca łi protège, e domiła persone ca ghe siga e spùa drio. Ałora, invese de vołer abołir sta manifestasion, besognaria łasargheła far, e presentarse live a sigarghe doso sti italianisti, fanatici del tricołore.

Secondo. Me son informà e go capìo ca ła cagnara xe par no ver grupi fascisti ca manifesta liberamente a Venesia. Però oltre a nostalgici del fascio, sta xente ła raprexenta i pì forti sostenitori del nostro cołonizator: l’Italia. Ałora, parké infotarse co ca riva ła statua de Napoleon (el primo cołonizator), ma sarar n’òcio co ca i riva i rapresentanti de l’atual cołonizator?

I veri veneti no dovaria mia esar in prima fiła a protestar sta manifestasion? No xe tanto par darghe doso al fascismo (che ben o mal ga fato parte anca deła me fameja), ma par far sentir a disagio ci ca vien in te ła nostra capitałe a sventołar ła strassa tricułore.

Mi penso de narghe, e esercitar el me dirito de espresion. Ciapo el treno e vao esprimar ła me identità veneta col me bel gonfalon. Fora i cołonizatori! Fora i fanatici del tricułore! Fora i talianisti dała capitałe veneta!

Filipo Dal Lago
Pnv

written by

The author didn‘t add any Information to his profile yet.
Related Posts