headermask image

header image

Parcuixìa ła sede del Pnv: se gała concluxa ła persecusion ntei nostri confronti?

Vota par l’independensa, vota par ła libartà, vota Pnv

Stamatina, so mandà deła procura de Padoa, ła sede del Partito Nasional Veneto ła xe stà sotoposta a na parcuixision. Nte l’anbito de na indagine a propoxito de na falsa firma falsa (sic!), el stato talian el ga pensà ben de proceder a na invaxion deła sede del Pnv.
El Partito Nasional Veneto no’l ga gninte da scondar, donca el ga parmeso co gran trancuiłità a ben 6 (sie!) Cangabiceri de portar a termine el proprio laoro.
Ała fine deła parcuixision i miłitari de l’Arma i ga constatà ke no ghe xera gninte de cuel ca i sercava. Prasiò gninte xe stà secuestrà dała nostra sede.
Demoghe ato ai esponenti dełe forse de l’ordine ke i xera in evidente inbaraso par ver dovuo portar a termine on ordine ke xe de sceta natura połitega e ke riveła on acanimento persecutorio ntei confronti del Pnv. El Pnv in ogni caxo no’l se łasa mia intimidir da sto tratamento ingiustifegà da alcuna motivasion de urgensa e/o gravità e anca inmotivà ntel merito, dato ke nisun socio, candidà, o sinpatixante del Pnv a xe incuixìo par alcun motivo.
Sto avenimento a xe ncora pì grave parvia ke avien durante na canpagna ełetorałe par łe ełesion provinciałi de Padoa e Venesia, łe prime ełesion a cui partesipemo.
Se sto ki a xe l’inisio, se dimandemo, cosa sucederà st’ano ke vien, co ke el Pnv el dimandarà el voto ałe ełesion regionałi par otegner l’esplicito mandà par indir el referendum par l’independensa? In realtà savemo ben ke el percorso internasional par otegner ła nostra libartà a xe on percorso parfetamente legałe e democratego, partanto a xe evidente ke el sistema partitego talian no’l sa pì come contegner ła voja de independensa dei Veneti.
El Partito Nasional Veneto anuncia inoltre ke tutełerà el proprio bon nome e ła propria imagine, anca riservandose ła facoltà de adir łe vie legałi ntei confronti de ki se fose rexo partesipe de na simiłe makinasion ai propri dani.

El segretario del Pnv Gianluca Busato, ke ancó festegia proprio el 40° conpleano in maniera originałe, el ga dikiarà:

“va vanti l’atension “particołare” połitego-giudisiaria verso el Pnv, in piena canpagna ełetorałe. Me auguro ke ora sto bagoło el finìsa. EL Pnv in manco de on ano el ga sconvolto l’ecuiłibrio połitego veneto, grasie a na proposta programatega de spesor e cuałità e in forsa de na levaùra intełetual e de na dedision ideałe dei propri soci ke no ga guałivo ntel panorama połitego deła nostra Nasion veneta. Diman a me auguro ke no ghe sipia na riedision sui giornałi del bagoło mediatego ke se ga visto el Sabo pasà.
In ogni caxo a xe fałìo l’obietivo de inpedir ai Veneti de votar l’ugnoła alternativa połitega e democratega par ła propria libartà, overo el Partito Nasional Veneto, el partito ke ga come obietivo l’indision de on referendum par l’independensa deła Venetia.
Da ancó a xe ncor pì evidente ke par difender ła nostra libartà, gavemo da votar Pnv, gavemo da dar sostegno ai nostri candidà ała presidensa dełe province de Padoa e Venesia, Stefano Venturato e Sabrina Tessari”

Trevixo, 14 magio 2009

Uficio Połitego Pnv


If you liked my post, feel free to subscribe to my rss feeds