PLEBISCITO.EU | PNV. Press News Veneto

El partito pro independensa deła Groenlandia el gà tastà na vitoria ełetorałe Mercore 3 de Giugno. Se gà verto no stroxo par na nova era in sto teritorio danexe, e l’obietivo de independensa par sta ixoła artica piena de risorse naturałi a xe senpre pì visìn.

El partito de sanca Inuit Ataqatigiit el ga vinto na magioransa, vinsendo el 43.7% dei voti, el dopio dałe ełesion del 2005, ciapando 14 de 31 careghe ntel parlamento.

El ga batù el partito social-democratego Siumut ke xe stà al potere par 30 ani e deso ga vinto soło 9 careghe ciapando el 26.5% (perdendo 3.9%).

El cao de governo sconfito, Hans Enoksen, el gà anuncià łe so dimision dopo oto ani come cao del Siumut.

“I ełetori i se gà pronuncià e mi rispeto el verdeto” el ga dito Enoksen in comenti riportà dal setimanałe Sermitsiaq. El Siumut xe visto come el partito ke gà portà autonomia in Groenlandia ntel 1979 e xera da drio el referendum par l’autodeterminasion del Novenbre 2008, aprovà co 75,5% de voti. El status de autodeterminasion el deventa efetivo el 21 de Giugno.

El primo ministro danexe Lars Loekke Rasmussen el gà dito Mercore ke xera “convinto ke el governo danexe el gavarà piena cooperasion co ła nova scuadra” in Nuuk, ła capitałe deła Groenlandia. L’ixoła ła riceve on susidio annual dała Danimarca – presapoco 3.4 miliardi de kroner (456 milioni de euro) ntel 2009 – ke sarìa scuaxi metà del so biłancio.

L’autodeterminasion ghe dà a l’ixoła el dirito ałe risorse Artike come petrojo e minerałi, e anca controło sora ła giustisia, ła połisia e, fin a on certo punto, anca su połitega foresta.

Kleist, el cao del partito ke xe curto de do careghe par ver na magioransa in parlamento, el ga dito ke “el vol ła pì larga magioransa posibiłe,” ma el gà escluxo de includere el Siumut nte ła coałision. I do partiti i xera in coałision fin al 2007.

L’ixoła ła ga on taso alto de alcołismo, e on bocia su tre a xe vitima de viołensa domestega, malnutrimento o povertà. Ła lista de atexa ai ospedałi ła xe longa, l’educasion ła xe scarsota e el divario fra riki e poareti el xe drio slargarse.

El portavoxe del partito de estrema destra danexe Partito Popołare Danexe, Soeren Espersen, on menbro del comità Danexe-Groenlandexe par magior autonomia, el gà aprovà el canbio de potere in Groenlandia.

“A xe on canbiamento sano ke porta fine a on governo ke xe stà al potere par masa tenpo e ne gà abuxà”.

Espersen el ga dito ke gà bone aspetative par Kleist “on vixionario convinto de mejorar ła situasion tragica pai putei, l’educasion e ła sanità”.

“Nisun partito al mondo el pol star al potere par 30 ani sensa socónbere a corusion e nepotismo” el gà dito.

Tradoto da: http://www.nasdaq.com/aspx/stock-market-news-story.aspx?storyid=200906031222dowjonesdjonline000718&title=greenland-election-result-bolsters-independence-hopes