Solidarietà ala LIFE e ferma condana dełe poxision ciapae dal’APV

Anca sol ke parlar de viołensa xe sbalià, senpre e sensa ecesion.

logolife

In merito al pignoramento inte ła sede LIFE avegnùo stamatina a Conejan, el Partito Nasional Veneto el esprime ła pì granda sołidarietà e visinansa al’asociasion de inprenditori Veneti, ogeto de na persecusion vergognoxa e insivil da parte del stato tałian. El PNV sa ben cuanto ke el stato tałian el gapia paura de ki ke alsa ła testa, avendo subìo inte sto ultimo mexe ripetùe represion e ataki al proprio dirito połitico de asociarse e de partesipar ałe elesion, co gravi intimidasion rivolte anca ai nostri sinpatixanti e sostenitori e sofegamento del pensiero połitico, portà vanti co cuestionari de stanpo maoista nei confronti de squaxi siesento padovani, nel siłensio pì total e nel menefreghixmo deła totałità dełe forse połitike omertoxe ke gà preferìo scondar ła testa soto ła sabia.
Al tenpo steso, el PNV ritien parò estremamente sbałiae e pericołoxe łe parołe del’Autogoerno del Popoło Veneto (APV) sul’ipotexi de istituir forse de połisia armae.
Anca se soło na mera ipotexi, ste parołe łe xe asurde e inconpatibiłi co na asion połitica che voja otegner un rixultato. Xe infati un aspeto ben conosùo el fato che i stati ke xe diventai indipendenti inte i ultimi àni ło gà fato par ła stragrande magioransa soło co mexi democratisi e no viołenti.
Ansi, ndoe ke se gà verificà fenomeni viołenti, anca se minoritari, a ghe xe sta un general rałentamento del proceso de independensa, dato ke i stati i gà vuo un bon xogo a farghe paura ała popołasion.
Ła strada deła viołensa ła xe sbaliada, senpre e sensa ecesion.
Ki ke suporta ste texi ne alontana tuti dal’independensa e dała libartà.
Xe sicuro ke a volte se vien ciapai dało sconforto e ke vien voja de ciapar scorciatoie, ma no se gà mai da demordar dała strada maestra deła democrasia e deła non viołensa, gnanca par far ipotexi asurde.
El PNV a ogni modo interonpe ogni comunicasion co esponenti del’APV fintantoké no vegnarà fata ciaresa su ste afermasion e no vegnarà xmentìa ogni ipotexi de uxo dełe armi. Se ghe fuse mai sta dei dubi in merito, se ribadise ke l’apartenensa a sta organixasion xe inconpatibiłe co l’apartenensa al PNV.

Trevixo, 25 de giugno 2009

Uficio Połitico del
Partito Nasional Veneto

written by

The author didn‘t add any Information to his profile yet.
Related Posts