VOTA PAR TI – VOTA PNV

manifesto-bEl pnv xe de sanca o drita?

Prima de continuar invitemo el letor a libararse da la mentalità de polarizasion itajana e de pensar al Veneto, prima de tuto. El pnv no el xe né de sanca, né de drita. El pnv no el xe in sostansa njanca on partito orientà ala aministrasion (fà dovaria eser tuti i partiti, normalmente) ma el xe on partito strutural. Sa vole dir? Vole dire ca el so objetivo no el xe de far politeghe de on certo tipo filoxofego (socialista, libarista, evc.), ma el xe coel de portar i Veneti a poder decidar so el so futuro fà stato independente.
A xe evidente ca i membri de el partito ga de le so idee politeghe e filoxofeghe, e naturalmente i le manifesterà libaramente, ma coesto no vole dir ca el partito el sostegna na texi pitosto ca nantra. Invese el pnv el se sostien so dei principi, 4 principi fundamentali, ca i vole eser na garansia de respeto de le idee e de le Persone.

I principi fondanti (sintexi)

Intel tempo de la fondasion de el pnv, A se ga pensà de stabilir dei principi fondanti importanti, parke orientandose a dimandar el riotenimento de la independensa de el ex Stato Veneto, e prevedendoghine na rifondasion strutural so baxi nove e moderne comprensive de la evolusion storega ca ne ga compagnà intei ultimi doxento àni, xera importante ver na baxe de referimento verso cui far voto de obediensa a garansia par el futuro.

Par on exame profondo e comentà de i principi, vardare kive.

1. riconose i driti de la Persona, la so libartà inviolabile de agir libaramente in funsion de la purpria volontà fin ca ela no la leda el compagno drito dei altri; el so drito natural, el drito a la vita e al respeto de la morte natural; el drito de goder dei fruti de le purprie atività e de conseguensa de poderli tenjer (principio de purprietà privà); el drito de sercar la felicità; el drito de manifestar le purprie convinsion politeghe e morali, e el drito de goder de sti driti a sensa prejudisio de la so poxision social, economega, juridica, de sexo, de età, de convinsion relijioxa, politica e moral;
2. refuta ogni forma de discriminasion rasial, ethnica, lenguistega, de convinsion relijioxe e sexiste;
3. aceta i principi de legitimità democratega e de la “no agresion” (principio de la no inisiasion de violensa);
4. aceta le norme de el drito internasional e pì in general i driti de’l homo stabilesti da la ONU e el drito de autodeterminasion dei Popoli fà A xe stabilesto intel Ato final de la Conferensa de Helsinki intel 1975.

Xeli ki i capi de el pnv?

El pnv invèro no el ga “capi”, el pnv el xe formà da libare persone ca libaramente le se agrega formando grupi teritoriali, anca concomitanti a altri grupi, par garansia de pluralità. El pnv el mete in rixalto la sovranità de la Persona. I “capi” alora i xe invèro dei coordinatori, de le guide, ca i vien eleti dai soci (ogni inscrito de el pnv).
Qualsiasi decixion importante ca pol tore i coordinatori (el Segretario, el Prexidente, i membri de el minor Consejo) la pol eser realizà solo se aprovà da almanco 3/4 dei soci. El pnv no podarà mai svendere i so ideali, el so logo, el so nome, a tersi sensa la aprovasion dei soci. In pì i soci pol promovare inisiative da portar ala atension de el minor Consejo e solecitar de metar al voto sta inisiativa. Coesta la xe la raxon par cui intel pnv ti te si paron, e no sudito.

Falo come el pnv a parar vanti el so objetivo?

El pnv el dopara strumentalmente el sistema eletoral itajan in Veneto, par rivar a ciapar consensi e poder otenjer el governo de la Rejon Veneto (ente itajan, ma dognimodo reprexentativo de na bona parte de i Veneti) par ciamar on referendum par la independensa de el Veneto (e se i lo vole, de tuti i teritori ca xera parte de el Stato Veneto a la data de el 1866). El referendum, oviamente, el xe ciamà co el suporto de oservadori internasionali, fà a xe reconosesto da el recepimento de el drito de autodeterminasion de i popoli co leje itajana n.881/77, inte na situasion de extrajurisdisionalità itajana. Anca se el isteso statuto de la Rejon Veneto (ca el xe na leje itajana, la n. 340/71) reconose i Veneti fà Popolo (vardàr el art. 2) in ogni caxo i Veneti xe on popolo parke i condivide na storia comune (diversa da coela de li itajani) na lengoa, na cultura, e na purpria organizasion social anca se tuti sti fatori i vari governi itajani (in particolar durante el periodo fasista, ma mantenjesti anca dopo par intarese de omologasion soradetuto da parte de i comunisti) i ga sercà de scancelarli.

Da ki xe finansià el pnv?

El pnv el xe finansià dai so istesi soci e da simpatizanti, co donasion volontarie, juto pratego in natura (material, stampe, volantinagi, publicasion so internet, evc.) e co le tesere de asociasion (15 euro).
Periodicamente vien publicà so el sito el bilancio e le spexe fate in modo transparente. Le spexe le vien stabilie da la segreteria e da el minor Consejo in funsion de le asion politeghe da far. No existe rimborsi, salvo no i sipia aprovà da el minor Consejo e par raxon straordinarie (ca xe dognimodo pasibili de contestasion da parte de i soci) e salvo par i anticipi fati da soci par spexe dexà determinà.

El pnv el xe nasionalista?

Si, el pnv xe nasionalista parke el promove la riconstitusion de la Republica Veneta, e el xe favorevole a na forma federal, ndo comuni o comunità (exempio la Magnifica Regensa de i Sete Comuni de Sleghe) sipia fortemente autonomi, al limite de na so propria independensa.
El pnv no el xe nasionalista intel senso ethnico del termine. El pnv el se fonda so principi de respeto de le persone sensa prejudisio, ma coesto no fa rinuncia a voler tutelar e securar anca el respeto de la cultura: par dirla in breve, el pnv no el varda el color dei oci, ma el varda la cultura e la identità, reconosendo ca, pur co specificità, intele Venesie (a.n.f. Triveneto) a ghe xe na cultura e na identità de fondo condivixa.

written by

The author didn‘t add any Information to his profile yet.
Related Posts