LENGOA VENETA AMOR MIO

di Gianluca Panto
venetian

In ste oltime do setimane gò leto na fraca de articoi a favor e contro l’insegnarghe la lengoa veneta nele scole.
Me par che sto argomento sipia stà na scianta doprà dala Lega pai so comodi politeghi de far reclan ,ma almanco lori gà afrontà el problem, invese tuti staltri partiti ciapando paura , con la scusa de presunte discriminasion e chel vegnia fato so on “caval de Troia” , li gà meso de scondon e a taxèr tute le ciacole sora el doparar le lengoe rejionai.
In tuti do i casi se sta montà diti e fato on mucio de stranboti sora coela che la xè parte dela nostra cultura .
Tuta sta barufa no la fa ben pa la conservasion dela lengoa, tuti i partiti cognaria ocuparse dela quistion.

Me so laureà Padova in ingegneria nel 1990 de dopo ver studià na fraca de latin e de inglese pena che so rivà inte’l medho dei afari cofà inprenditor e profesionista me so de boto incorto de no saver par gnente la lengoa veneta, orpo.
No xè sta on mistiero picenino.
No me sarisia ramai sognà de rivar ala fin del XX secolo e catar chel Veneto fusie incora na vera lengoa franca inte le tratative comersai, dal notaro, dal avogadro, inte le mediasion imobiliari, co clienti, drento i stabilimenti de produsion.

Me riferiso ae nostre provincie venete, par forsa.
Sicome jiero de lengoa mare italjiana me so de boto dovest metar de inpegno pa rivar a ver on bon comprendonio de sta lengoa e cognar parlarla, anca, fin che so rivà smanetarla benon.
( Deso so contento che penso e tiro sarache in venesian )
Fando cusita gò vesto dal bon na pì granda considerasion vanti i me scoltadori, dandoghe arichimento ala me reputasion de omo afidabie par via de verghe zontà sta virtù de esar on “locale” e questo gà inculcà mucio pì stima de mi ai me clienti, da mi dada indrio gualiva, e gò catà fora on tesuto social e economego personal che me gà rendesto rico.
Deso finalmente i me ciapa come on de lori, e scusa se no se poco sta roba pa on inprenditor chel vive e laora in na Rejion che la xè tra coele col pì alto PIL pro capite.

Inte’i ultimi ani però gò notà na regresion nel doparar e conosar sta lengoa
Xè drio rivar vanti na nova jienerasione de inprenditori sansa storia e sansa radixe che no li cognose par gnente el Veneto.

Ma sti kive no li capise gnente, purpio deso che la economia ga ciapà catateristeghe trans-nasional e globali santi, la cultura ( e la lengoa) xè deventae el ponto fondamental del proceso de creasion de valor, el unego che pol salvarne dala concorensa foresta.

A staltri invese a ghe intaresa altro che far skei el pì svelti posibie , contro tuto e contro tuti.
Al sto sistema mi no ghe credo, li gà par forsa da vegnar spasadi via.
Parke se la more na tradision e la vien descanselà na lengoa , more anca anca tuti i valori che ghe va drio che li xè pai veneti : el saver far, la fadiga del laoro, la dedision, la coalità che la vien fora dala tenacia.

Question de conveniensa ? Anca , seguro, però , scuseme tanto , deso mi me so inamorà de sta lengoa , la xè dolze e musical cofà na lengoa greca.

Staltro zorno me lo gà ricordà na vecia e cara siora zaratina, na ultima veneta, fresca e zentil come la so parlata, devota sitadina e serenissima e colta.
Care toxe e toxati, mi ala lengoa veneta no ghe rinuncio, penseghe ben anca voilatri, xè na richesa.

Treviso 14-8-2009 more Veneto.

Gianluca Panto

written by

The author didn‘t add any Information to his profile yet.
Related Posts