Pora Venessia

bianco rosso verde

Che Setembre tristo par la nostra capitale.
La setimana pasà el ga marcià in trionfo el ditator venesuelan Hugo Chavez. Co la so camizeta rossa a xe rivà la caricatura vivente del clasico regime totalitario sudamerican.
Come tanti ditatori opresivi prima de lu, el gode de on gran suporto democratego in caxa, e de na gran popolarità in volta pa’l mondo. No importa se xe represivo co la stampa e se confisca i beni de atività privà, tanto lu xe la incarnasion de la volontà del pueblo.
E par el pueblo sinistro de noantri, sto tracagnoto de omo el rapresenta l’eroe de na perdente cauxa socialista. Elora tuti al Lido a sbavarghe doso a na personalità che ga pena struconà su Ahmadinejad in Iran e Gheddafi in Libia.
Tuti in zenocio par adorar l’omo forte, l’amigo dei monopolisti socialisti (difati el ga precizà de esser amigo anca de Berlusconi). In Rusia da Putin el dichiara el so suporto par l’indipendenza de l’Ossezia. Se xe fata co i cari armà (el consenso vien dopo…), alora si, a xe da veri revolucionarios. Ma da naltri el sprota che lu ama l’Italia, “evviva l’Italia” el dixe.
E no stè credar che xe parché on foresto no’l pol saver de la cauxa veneta. El Dalai Lama e xe ndà via da Venessia co la bandiera (veneta) de on popolo, miga co la bandiera (taliana) imposta da Napoleon (nantro ometo forte che ecita i nostri revolucionarios).
Certo che i nostri sinistri venesiani mi li compatiso se i ga invidia de no ver on ditator socialista come i venesuelani. La revolucion par el bene del pueblo ignorante se ga da inporla da l’alto parché se te provi la via democratega, invese de na camiza rossa te ris-ci de catarte el pueblo unido co su na camiza verde.
E difati ancó xe tocà a Umberto Bossi umiliar la nostra capitale co na sfilata de veneto-padani tuti vestìi de verde kitsch. Come la Colonna Rossa, el Menhir Verde el xe el secondo pilastro indispensabile par tegner su la baraca ITA. No importa se invese del Che e de Fidel, i nostri veneto-padani i idoliza Asterix e Obelix, l’importante xe darghe calcosa par mantegnerli in riga, contenerli, faghe cantar anca a lori l’ino talian.
Eco che la Lega Nord Italia la xe nata in parte parché la sinistra elitista la xera sempre pì distante dai disagi popolari, e in parte par contener la riscioxa nasita dela Liga Veneta.
Guai lasarghe spasio a on movimento identitario veneto, co na autentica rivendicasion storico-linguistego-culturale. Mejo inventarse na pajasada artificiale che no porta da nisuna parte.
E dopo venti ani, ecoli ncora tuti lì, fedelissimi, a ciapar ordini da uno da fora che no ga altro interese che mantegner el status quo, e la piramide de privilegi e nepotismo par tegner in riga tuti i so caporali.
Evità el riscio Liga dei ani otanta, i xe stà boni de ricrear l’aparato de potere sul veneto che gavea la vecia Balena Bianca: chel intorcolamento democristian de clientelismo fra banche, politici e industria.
Cussì, par completar el quadreto a go meso el Papa Ratzinger che in sto contesto tricolore el xe solo colpevole parché vestio de bianco. Però el raprexenta la Cexa che anca ela, me spiaxe dirlo, la serve par tegner su ITA.

I veneti i xe sempre stà na popolasion religiosa, na volta anca pì de deso. Ma aver fede no implica mia subordinasion politega. Na volta difati la Serenisima la se serniva el proprio patriarca.

Ancó invese, anca rispeto a altri stati catolici, la Cexa la ga magior controlo e interesi rento el stato talian. Oltre a tasar i abitanti del stato talian, i ga spasi riservà ntei telegiornali e ntei quotidian, i va a braseto col partito pì centralista e italianista (l’UDC), e la lista continua.

Mentre in volta pa’l mondo la Cexa no la ga vù problemi a difender i diriti de popoli soto el taco de regimi, par naltri la starà sempre da la parte de l’Italia unìa. Come istitusion la ga masa interesi anca ela a tegnerne “italiani”.

Ecole qua le tre forse che mantien i veneti soto el taco talian. Xe paradosal parché le dovaria esar tri movimenti baxà sui diriti dei pì deboli, dei pì poareti, dei pì emarginà.

E non a caxo ntel Veneto italiano ghe xe sempre stà el magior disagio sociale. Un descòmodo che ga sempre catà consenso a seconda de l’inclinasion ideologica. Co Toni Negri na volta e co i centri sociali ancó, i veneti i xe sempre stà i pì ativi nel mondo de sinistra. Le derive venetiste rento la Lega Nord Italia le xe quele pì pericoloxe incontrolabili. E par la Cexa el Veneto el xe el pì gran contenitor de fedeli, de risorse e de volontariato.

Un disagio che in salsa bianca, rossa o verde, i taliani i xe sempre stà boni de incanalar par tegnerne soto.

Filipo Dal Lago

PNV

written by

The author didn‘t add any Information to his profile yet.
Related Posts