Ti no te pasi mia

Na roba che propio a no son mia bon de soportar l’è l’arogansa. Chela inpostadura odioxa che te fa pensar ca ti te sipi na persona mejo de mi e ca te posi, par sta raxon, tratarme cofà na strasa o on sciaveto che no ga mia bexogno de respeto. Co vardo o son tratà co arogansa, me vien suxo na rabia che la sarìa mejo ca la staxese bona. Geri, co go finìo de disnar, me invio par ndar a tor me moroxa a Milan. A son in autostrada arente l’usida de Bresa e son drio ndar ai 130 km/h so la tersa corsia parché masa automobilisti de la domenega che i va ai 90 km/h i ocupa fisi la segonda corsia (co la Venetia la sarà libara, gavaremo da rivolusionar i test scriti e pratici par ciapar la patente…). A on serto ponto a vardo intel speceto e me vedo che i’è drio rivar sparà (ma sparà dal bon) du o tri machinoni co i veri scurà e i lanpegianti blu. I riva subito tacà a mi che son ancora drio superar na fila de bogoni de metalo e plastega; i me riva propio tacà al culo, a do sentimetri, i maledeti. Tenti: no le xera machine de la polisia in mision ma tre auto blu che i portava el politico de turno co banda a seito. Sì, bon, confeso: co vedo ste robe, a me diverto asè a farghe perdar pì tenpo posibile co mi che faso da tapo. Sì, confeso: a son na carogna. Pasa calche secondo, mi ralento par non superar masa de freta la colona de destra e l’auto blu de drio de mi la scuminzia co le sirene; a par ca i se gavia stufà de spetar, poareti! No i me fa né caldo né fredo e vo drito (lento) par la me strada. Insoma, par strenxar, i gavea el pevaro inte le parti base e a li go fati sbruxegar par ben, i parasiti.
La me l’è na protesta. Nel so picinin, l’è na dixobediensa sivil contro l’arogansa italiota e veneto-italiota de sto Stato che se parmete de esar de sora le regole. Parcosa i ga da ndar sparai? Parcosa no i ga da esar confà noialtri xente normal? Parcosa i ga da metar a riscio la me securesa sensa motivo? No i jera machine de polisioti che i ga da ndar cofà site par arestar on crimimal, no, le xera auto blu, auto del privilegio. L’auto blu co l’arogansa de cuei rento la xe on dei sinboli piasè ciari de sto Stato de magnapan a tradimento e del nostro esar suditi e no sitadini.
Mi, nel me picinin, ogni olta che poso, a vojo dirghe ciaro che a son on omo libaro, anca se luri i me considera on sudito e na persona inferior. Mi, nel me picinin, a ghe farò perdar vinti secondi de la loro vida da parasiti co le loro caso de auto blu. No fiolo, mi a no te faso pasar, sbasa le rece che no te me fe mia paura.

Luca Vnt

[Trato da VenetiaLibertarian.org]

written by

The author didn‘t add any Information to his profile yet.
Related Posts