A ghe xe capitale e capitale

bernaSabo, domenega e luni a son ndà a pasar co me moroxa on weekend longo a Berna in Svisara. La destinasion la ga selta ela parché a vedar sora internet la parea na cità bela da vixitar (par dir, el centro storego l’è patrimonio de l’Unesco) e anca parché la ne vegnea comoda co on Cisalpino direto da Verona a Berna sensa canviàr treno che, dito tra nialtri, l’è senpre na rotura de balote. A son stà contento parché la m’è piaxesta proprio. Na cità no masa granda (na popolasion de 130.000 anime), tegnua gran ben, gente ospitale e cortexe, robe bele da vedar (tipo el Zentrum Paul Klee e el BärenPark). Insoma, na bela cità, co le so atrative tipiche e la so sèna cultural, che no la te stofega e indove a vivarghe no te te metaresi le man intei cavei.

Se no lo savì, Berna l’è la capitale federale de la Svisara.


A no son mia sta bon de no far paragoni tra la capitale federale svisara e la capitale centralista de lo Stato italiano indove, can dal porco, par cancari de la Storia, semo drento anca nialtri. Co so ndà a Roma par la prima olta inte la me vita lo scorso febraro (a go fato in tenpo a ndar a Tōkyō do olte prima de ndar a Roma par la prima olta…) a son restà on fià sbalinà par el “trafico umano” ghe go vedesto. Te bastava slongàr n’atimo la recia inte na tratoria par scoltar discorsi de politici su ti che te voti lu e lu che lora te vota ti. Te bastava star fermo sinque minuti so on angolo de na strada par vedarte pasar sparà la solita auto blu co corteo de polisia in moto. Te bastava farte cascar l’ocio so le careghe dei bar so na piasa del centro par vedar portaborse e simili. Insoma, Roma la me xe paresta proprio la clasega capitale che la sta in piè par tuto cueo che ghe gira intorno a l’aministrasion de sto Stato centralista indove i politici che i sta, apunto, a Roma i vol decidar anca quanti rodoli de cartaigienica i ne serve par stimana. L’è normal che Roma la sipia cusita. On Stato cusita centralista indove i politici i vol pensar a tuto luri (par verghe pì potere) l’è normale che el gavia na capitale ingolfà de parasitismo politico che la vive sora i schei che i ne roba.

Berna, inveze, l’è na capitale de on Stato confederà indove ghe xe gente ca la parla todesco, svisaro-todesco, francexe, arpitano, italiano, ticinexe e romancio e che, sta gente, la sta insieme parché la ghe convien star insieme e parché i singoli cantoni (e, sora de tuto, parfin i singoli comuni) i ga na libartà de decidar che nialtri se sognemo. Berna l’è la capitale ma la conta poco, un’ostia. I comuni e i cantoni i’è cuei che conta, i fa par luri. Berna no l’è mia na capitale parasita parché no la ga gnente da parasitar, parché la Svisara l’è on Stato confederato indove el governo centrale el ga pochi e ben definii ruoli.
Deso i italo-padani i vol inseminir la gente co la m****a de el “federalismo fiscale” ma mi a speraria tanto (e el Pnv l’è ki anca par coesto) che la gente no la ghe caschese mia. El “federalismo fiscale” no l’esiste. No l’è el primo paso de gnente e no’l portarà a gnente. Roma la sarà senpre Roma e seiteremo a sognarse na capitale no parasitaria fà Berna.

El Pnv el vole na Venetia libara. Co gavaremo vinto el referendum par l’autodeterminasion de la Venetia, la nostra capitale la sarà Venesia. No la sarà mia na capitale “Roma style” ma na capitale de on Stato confederato indove le comunità le gavarà el potere reale e Venesia, fà Berna, la gavarà pochi e ben definii ruoli.
Caveme na curiosità: ve falo tanto schifo on scenario cusita?

Luca Schenato
Pnv Verona

written by

The author didn‘t add any Information to his profile yet.
Related Posts