PLEBISCITO.EU | PNV. Press News Veneto

In te ła trasmision Ore12 su AntennaTre (del 31 de Otobre) ghe xe stà un bel speciałe su Halloween. Dei esperti de tradision venete i parlava de come sta festività ła xe na festa celebrà anca in tera veneta e non na recente inportasion mericana.

No me pareva vero de cuanta xente ła ga ciamà par testimoniar che anca lori i gavéa noni e genitori che ogni vigilia dei Morti i faxéa na lanterna co na suca e ghe metéa rento na candeła. Ła tradision ła vol (secondo i esperti in trasmision e i rexoconti dełe tełefonade) che se inpisa candełe rento łe suche parché xe ła sera che i morti i vien catarne. Oltre inpisar łe candełe par indicarghe ła strada ła xe uxansa anca łasarghe calcosa da magnar e da bevare.

Sta chi ła xe ła stesa tradision irlandexe che xe sbarcà in Merica co ła gran imigrasion otocentesca. Łori i ła ciama Hallowe’en che xe abrevià par All Hallow Evening e cioè ła Vigilia de Tuti i Santi. Come tante festività europee ła xe na fuxion fra festività cristiana e tradision pagana (celtica in sto caxo). In America, oltre a far lanterne de suca e łasar fora da magnar pai morti, i toxati i gà tacà inpersonar sti spiriti e nar in volta a torse da magnar. “Dane da magnar, o te ne conbinemo una (Trick or Treat)” i dixeva, na specie de “o la borsa o la vita”. Anco’ i xe i putei pi picenini cha va in volta co le sporte pien de poci, e xe na ocaxion par stuar la TV e nar fora e conosare i vicini de caxa.

Dopo che sta nostra tradision łe xe stà scuaxi scansełà del tuto, de recente łe xe tornà in salsa mericana. Donca, co che ve riva dei boce a domandarve poci, ricordève che i xe drio inpersonar dei spiriti che generasioni de veneti i gà cełebrà par secołi, in atexa de onorar i propri morti. I nostri veci mancà che i se “reincarna” in sta serata de festa grasie ała imaginasion dei nostri putei. El tuto co no spirito de comunion dove che in sostansa se se scanbia da magnar co i nostri vicini de caxa. Riapropriemose dele nostre tradision.

Filipo Dal Lago
Pnv