PLEBISCITO.EU | PNV. Press News Veneto

La mancansa de cultura de libaro marcà itajana la me sconcerta ogni dì ca pasa, e son sinceramente preocupà, no voria ca anca imprendituri veneti i sipia on fià come coeli itajani. La preocupasion la riva lexendo la trovata lancià da el prexidente de picola industria de Mantova, messer Giuseppe Morandini, ca el propone la “T-Holding” (nome magico par la sonorità englexe ca no’l dixe on figo seco) par salvar le imprexe e i posti de lavoro (secondo lu).

Tuto parte da na constatasion, ca solo i dediti a la lusuria e co podere de governo no gaveva visto e se ostina a no vedar: el precipitar de la economia reale, ca xera in crixi prima de ogni gran crixi e ca deso el xe in caduta libara, nonostante la leziera inversion de tendensa mexurà in altri stati come ben prexentà in sto articolo.
Le solusion tanti I le conose, ma da le bande italiche no ghe xe rece par scoltar, e pararia ca el dogma socialista staga ciapando le menti anca de imprendituri.
Cosa xe sta “T-Holding”? Dexà da el scomisio co el “T”, ndo luri I dixe staria par “tutela dei patrimoni imprenditoriali, industriali, finanziari e occupazionali”, se verxe la anima protesionista de el progeto, ca el se inserise parfetamente in on clima fasista come coelo promoso da el governo in carèga. La Holding la saria na società ca la contien altre società, in sto caxo specifego, imprendituri i cedaria le so proprietà a sta T-Holding deventandoghene socio, leteralmente “tutelando il valore patrimoniale e liberandosi delle garanzie personali”, e dopo vegnaria fato on fondo a capital privà e publico (ahn però!) par tirar rento le altre imprexe picinine; infine sta holding la podarà contare so le agevolasion fiscali previste da la norma so le agregasion e pescar diretamente dai fondi de garansia de le banche.
Insoma, no xe na operasion par eser pì competitivi, la xe na operasion par a) redur la concorensa (se te tiri rento tuti in sta holding, xelo chi ca comanda dopo?); b) favorir el controlo de le imprexe picinine; ma soradetuto c) pararse el culo co i skei dei altri.
Complimenti, davèro complimenti! E sti kive saria imprendituri?
Coesto el xe nantro paso verso el sistema de economia pianifegà stile Union Sovietica, on sistema ca el ga ben demostrà le so falacità.

Capiso, oviamente, ca rento el scatolon smarso ciamà Itaja, no ghe xe tante speranse, e i fati ne lo sta dixendo. D’altra parte nantri del pnv semo kive par coesto, par cambiar le robe, e deventa vèramente urgente convocar imprendituri sani par formar na rete de imprendituri concordi so la opinion ca la favorisa el recupero de competitività, na parola ca ultimamente la xe finia intel desmentegaro.
E sta competitività la se ga cavando via tuto el ciarpame ca impedise le nostre atività, da le tase, a la burocrasia, robe ca no ghe xe o xe on mucio de manco, no in Cina, ma in Slovenia!

El obietivo primario par le imprexe Venete el xe coel de VENDAR, e par vendar se ga da ver on prodoto intaresante a on preso intaresante. I do elementi pur ciapando na gran vastità de sfumadure, i resta fundamentalmente ligà tra de luri e i xe el fundamento par poder competere intel marcà, ca de rifa o de rafa el xe, el resta, e el restarà global.

Sarà la ocaxion anca de studiar coalcossa de concreto, co corajo, come ga fato par exempio Giorgio Fidenato, el imprenditor de Pordenon ca el se refiuta de pagar le ritenute dandoghe tuti i skei in busta ai dependenti.
E sarà la ocaxion par dar manforte a on partito come el pnv ca el se stà batendo co eroismo contro tuti par defèndar vèramente intaresi dei Veneti.

A xe par sta raxon ca stemo par organizar na serata de prexentasion de la inisiativa Veneti1000x1000 in congiunsion co la prexentasion de el pnv, par imprendituri de el ovest vicentin.
E contemo ca el sipia el primo paso de on percorso itinerante par nare intei vari centri de el Veneto, ndo ti te pol dar el to contributo concreto sia jutando el pnv, sia promovendo sta inisiativa, sia oviamente DONANDO.
Parafraxando Neil Armstrong, on paseto picinin par nantri, par on gran salto par el Veneto venturo!

Claudio Ghiotto