NORD EST DE GNISON

Intarvista a Gianluca Busato, segretario del PNV (Partito Nasional Veneto)

tólto da GaxetaVeneta.com

giane-miniGAXETA : Lora, Progeto Nord Est e Unione Nord Est i se gà metìo d’acordo far na lista onitaria ae regionai.
BUSATO : i gà fésto puìto, ghe auguro de ciapar on mùcio de voti a Ferara, Bologna e Ravena.

GAXETA : Ferara, Bologna e Ravena?
BUSATO : Sì, chel lì el xe el nord est, naltri A no semo nord est de gnisuni, naltri a semo la Nasion Veneta.

GAXETA : Dae indiscresion A pararìa che anca Comencini, Riondato e Covi i se gapie metìo d’acordo pa far na lista ònega che vol un referendum par el Veneto statuto special…e valtri?
BUSATO : Sto grupéto el ne gà dimandà de firmar un acordo, sémo drìo spetar lexar de cosa ca a se trata pa torlo in considarasion. A xé naturàl ca no ciaparemo gnisuna decixion in merito sensa na anpia consultasion de tuti i soci, che i xe i asionisti del PNV, i veri paroni de un partito che no el gà on paròn.

GAXETA : Ma xelo vero che valtri volè dividar el Popolo Veneto?
BUSATO : Sì, a xe vero, a volemo dividarlo in do parti. Na parte minoritaria ca la vol restar soto el taco talian e, st’altra majoritaria ca la vol l’indipendensa Veneta.

GAXETA : Ma fa podìlo pensar de farghela, no ne par ca sì mejàri de méjàri rento al PNV…
BUSATO : La storia i la fa i grupi picenìni e organexà che li sa antisipar la storia, e naltri a semo dala parte justa, visto che dal dopoguera a ancuò a semo pasà da 77 stati a 200. La dixintegrasion politega la xe la risposta natural l’integrasion economega dela globalixasion. Ceo xe beo!

GAXETA : Parkòsa gavìo fésto le primarie?
BUSATO : Par na chistion de democrasia e parké a xerimo stràchi vedar candidature calà da l’alto, da le segretarie dei partidi polìteghi.

GAXETA : Ma no gavìo mìa paura ca ve scanpe de man sto proceso?
BUSATO : Sarìa la persona pì contenta del sto mondo se ocorése, parké a vorìa dir ca a semo sta bòni scaenar la voja de libartà, de farla partir dal baso. Me auguro propio cusì ca sto proseso el ne scanpe da le man, par dirla tuta. L’entuxiasmo el xe grando, e sta còsa me fa on gran piaxer!

GAXETA : El segretario del PNV par che candidato porteo?
BUSATO : Par tuti, parkè i xe tuti bravi. Ghémo da ver na gràn amirasiòn pa le parsòne ca le se mete in xogo pa la indipendensa.

GAXETA : Sol na curioxità vànti seràr : ma parkòsa puntèlo cusì so temi economeghi? No pensèlo mìa ca la coltùra la sìpia suparior e pì nobile fa argomentasiòn?
BUSATO : A pararìa bruto dirselo, ma co te ghè i schei, a te pol anca far filoxofia, ma se no te rivi fine mexe te vansa poco tenpo par far coltura. Sol co l’indipendensa a podemo tutelar par ben anca la nostra coltùra, parké gavarèmo anca la trancoilità economega pa fàrlo.

written by

The author didn‘t add any Information to his profile yet.
Related Posts