PLEBISCITO.EU | PNV. Press News Veneto

Ma na piko£a, Svesia (cfr post soto a cui non rieso a rispondar) voria dire en pratega, che £a tasaxion, el varno e £o Stado i restaria compagni de desso (£a diferensa fra £a presion fisca£e svedese e koe£a tajiana la me par presindibile).
Insoma se trataria de far na piko£a Italia (o Svesia, a seconda dei punti di vista) so£o – pardoneme e£ termine – manco “terona”? Parché coesta me par esar £a difarensa.

Caro Lorenzino Gastaldi,

1) skei italici.
Intanto se gavaria da dir ca pì ca skei italici I xe soradetuto skei veneti. Condivido la idea de no farghine na fonte de redito, al isteso tempo però no me faria masa problemi de doparar i “skei italici” par dargheli a la cauxa de la independensa, al limite fato salvo i rimborsi so le spexe vive, visto i skei ca la Itaja ne magna ogni dì!

2) Tase
Come linea de principio, da el me punto de vista le tase (imposte) le xe on furto. Preferiria dognimodo prima cavare le tase itajane 😉 So ca serve na linea pragmatega, dato ca no se pol ver suito tuto, e la idea la xe de urtar, sfrutando tuti i cavili posibili (e al limite anca coeli “imposibili”), par far tornare indrio ai Veneti coel ca vien cavà injustamente da la Itaja.

3) Salvar el teritorio
La cementifegasion la xe na conseguensa direta de do robe: a) la speculasion edilisia, b) la mancansa de spasi riciclabili.
La speculasion la se verifega par ste do raxon complementari: da na parte le restrision urbanisteghe “a geometria variabile” e da coelaltra la domanda de edifici ca la sostien el marcà. Oviamente la seconda no la xe na roba negativa da ela da so posta, ma el problema el nase da coela “geometria variabile” ca la se incarna co operasion, ciamemole de insider trading, ndo taluni sa in anticipo ndo se pol mejo investir, parché el sa ca ghe xe na man ca jutarà in coela diresion. Sta situasion la xe par certi versi simile a coel ca capita al sud, segno ca el marsume lo gavemo intei nostri comuni.
El secondo elemento ca el concore a sto fenomeno el xe coel de la mancansa de spasi riciclabili. Mi par spasi riciclabili intendo spasi veci ca pol eser rincurà, ma ca par raxon de mantenimento de pseudo beni culturali, el resta cristalizà. Se vardemo le cità vedemo ca ghe xe on mucio de spasi sbandonà, ca I xe semplicemente veci e sensa valor, salvo ca par pasionà estremisti de le robe vece. Intei comuni ghe xe tecnici ca i bloca interi quartieri co piani ca I xe de protesion de sti spasi, sensa curarse de la domanda ca ghe xe, e ca inevitabilmente la se sposta nando far edificasion so le aree verdi fora da le cità, co mega centri comerciali ca no solo i danegia el ambiente, ma i svoja anca i centri storeghi.
Alora par sistemar sta situasion serve na riceta: far pulisia de tanti regolamenti e liberalizar la edificasion rento le cità finalizà al rincuramento dei spasi (no dei edifici) anca concedendo ampliamenti de cubatura, posibilmente soto tera, ma no escludaria anca sora. Coesto naturalmente no vol dir de soprimar parchi e aree verdi inte le cità, ansi, xe on modo par darghe ancora pì spasio.
Tute le ipotexi de sopresion (no edificar in cità e gnanca fora) le xe destinà solo alimentar el malcostume, parché no xe posibile fermare na domanda de marcà.
Infine ghe xe da rompar el binomio tera edificà=tera co pì valor, parché no se valoriza le aree verdi. Par valorizar coeli ca tien aree verdi se ga do mezi: detasasion (ma mi voria cavarle isteso le tase) o compensasion, ndo coeli ca edifica compensa. La procedura oviamente la và fidà a tecnici, el nostro scopo xe darghe a luri le diretive.

4) Sanità.
Nonostante mi sipia on libartariàn, son però convinto de la utilità de na protesion de la salute, almanco par coestion de baxe. La raxon la xe ca na comunità sana la xe on vantajo par tuti. La idea de la sanità publica la xe pasibile de mejorie, ma inte la condision pre-independensa no podemo far masa. El motivo el xe ca i skei par la sanità I viegneva tirà su da le tase de IRAP, ca però la xe stà cavà. El stato itajan ne para indrio on fià de skei (sempre manco) par mantegner el sistema sanitario. Però st’ano I ga redoto sti skei ancora, e grosomodo I basta malapena par pagar la spexa corente: se se guasta na machina, ne toca lasarla live a smarsir! Coesto paraltro el xe on fato grave, ca pochi sa!
Sistemar la sanità, co qualsiasi filoxofia te vol doparar, no xe posibile quando te ga on ladro ca el te ciava i skei.
Tuto coesto quindi el xe rinvià a el progeto de restorasion de le finanse, de i citadini, no de el ente Region. Ca dopo par far coesto faremo on zugo de bussoloti par fargheli tornar ai citadini, sarà na mera operasion tatica.

5) Energia
La energia la xe no solo on gran bixogno de la nostra società, ma el xe anca na gran oportunità!
La impiantasion de centrali nukleari la xe a me modo de vedare no tanto riscioxa (credo ca le centrali le sipia discretamente secure) ma antieconomica! Le centrali nukleari le se prexenta co on problema multiplo: a) le costa na montagna de skei; b) ghe vole tanti àni prima de poderle ver in funsion, e savemo come cambia le robe in presia; c) le xe par forsa controlà da i governi, e nuantri libartariàni semo contro el controlo de i governi da cui se ingenera magnarie, cortigianerie e potentati fora da el contròlo direto de i citadini ca par nu i xe i vèri sovrani; d) el combustibile el xe raro, postà in aree sotoposte a tension de goere, e destinà a costar sempre pì skei (e el xe dexà caro); e) la construsion e la gestion la xe concentrà in poche man e no la concore a crear svilupo economego e ocupasion locale; f) co i costi de na singola centrale se pol far diverse instalasion eoliche, o anca hydroeletriche a basa caduta;
Donca l’impegno el xe de crear sistemi de produsion de energia co altre tecnologie ca le xe a la portà de le nostre industie, premiando coeli a baso o nulo impato ambiental e co la minor o nula emision de sostanse inquinanti, favorendo cusì anca el svilupo e la reserca local, la cresita de le imprexe e de conseguensa la ocupasion, so on marcà ca el se stà verxendo sempre de pì a level globale.

6) Laguna
Confeso ca coesto el xe el problema pì complicà. Ansi lo digo sensa meze mexure: la xe na rogna colosale.
El xe on tipo de problema ca, par via de la existensa de na montagna de altri problemi urgentisimi, no go gnanca meso in cantiere, in quanto le posibili solusion le implica la necesità de poder dispor de na economia ca funsiona (e semo drio nare doxo par na deriva pericoloxa) e la piena autodeterminasion so le sielte politeghe da far.
Me despiaxe, parke la laguna La xe no solo la cùna de Venexia, ma La xe anca on ambiente naturale straordinario e co potensialità notevoli. La domanda ca me faso tante volte la xe: porla sta “pòcia” de aqua sostegner na atività portuale e humana fà coela ca la xe drio sostegner? Se vardo na laguna simile, la laguna de Maran, vèramente A ghe ne resto sconcertà!
Tanto xe grave la situasion de la Laguna tanto ga da far capir quanto gravissima xe la situasion generale se co tuta la sensibilità ca gavemo rivemo a dir ca par deso el xe on problema secondario!

Lo rengrasio par le domande ca el ga fato, concedendone la oportunità de fornir informasion e anca ciapar spunti de profondimento.

Pol darsi ca de le me resposte, no ghe xe piaxesto tanto talune, intel caxo inauguro na fraxe ca da deso in vanti dopararò sempre a la fine de repliche e dibatiti: no vojo voti par ipocrixia

Sereni saludi, Claudio G.