INTARVISTA A GIANLUCA PANTO

vota per CLAUDIO GHIOTTO E GIANLUCA PANTO

—-

Tolto da GaxetaVeneta.com

GAXETA: Gàlo on nome ca el péxa .
PANTO: O savevo de sta dimanda, ma no intendo farme bel sora la justa fama de st’altri. A spere sol ca el pose darghe pì visibilità al partito ca me prexento (PNV Partito Nasional Veneto).

GAXETA: Da ndò rivela la so famejia?
PANTO: Naltri a sen Veneti da mar dele ixole jonie, armadori , costrutor de nave . El me antenà direto el xè sta canselier dela rejina Corner. Originario de Corfù el abitava Candia (Creta) ma la Serenisima lo gheva destinà Sipro, servir la rejìna . Esendo so servidor el ghéva rivà co ela Venesia inte’l 1489, co ela la gà asa l’ìxola ai Veneti . Da lora ghemo senpre abità kive, a Venesia o rènte ste bànde.
Venesia li gà scomisià far i commercianti de pece. I la inportava da la Slavònia, li forniva la sità e anca l’Arsenal.

GAXETA: E dopo ?
PANTO: Intorno el 1600 li xera gràn richi, ma cascà la republega li se gà catà in bràghe de téla, a no ghe jiera pì laoro. De do fradeli on el xè anca scanpà in Merica, par via de esar independentisti i Ostriaci i voeva farli fora. I gavea lasà kive on fiol orfano , ca el gà scanpà in teraferma far el marangòn, finestre e scuri.

GAXETA: Lòra de fameja Independentisti, lo gavì so la sàngoe?
PANTO: Pararìa de sì.

GAXETA: Cusì da sto marangòn a sarìa partìa l’industria de finestre e scùri ?
PANTO: Si, ma me nono el se gà fésto licoidar prima, el se gà trà sol simento armà dopo la goera, lora el xèra el primo material inovativo da construsion dopo el legno.

GAXETA: E so àmio Giorgio cosa séntrelo?
PANTO: A emo dela stesa tribù, aso valtri i detali.

GAXETA: Vorlo dir calcosa sora la morte de so àmio?
PANTO: A no so mìa on conplotista. Ma sora el episodio no xè mai stà fésta na riconstrusion sèria e credìbile. No digo altro.

GAXETA: Co naltri a no ghe xé sensùre, el se vèrxa pùr….
PANTO: No go gnìnte da xontàr, scuxème.

GAXETA: Vorìselo la riconstitusion dela Republica Serenisima ?
PANTO: El mondo deso el xè difarente, chel model saria anacronistego. Ma independenti si. Co la gà cascà ghévino sernìo l’aleà sbajià. Mi prefariso i Inglexi, ne gavaria jutà. El xè on pòpolo grando , co poso vago Londra , la me segona sità.

GAXETA: Lòra parlélo inglexe ?
PANTO: Me rangio , sa vorìselo dir ca naltri Veneti sémoli inbriagoni gnoranti ? Mi le lengoe me piaxe, deso ghe dago me fia ripetision de latin.

GAXETA: Lexo ca lu el xè è ijgenier sivil, anbiental ,industrial e dela informasion.Fà gàlo fésto ?
PANTO: Studiando , studiando e pasando i esami Padova, ala Oniversità de Galileo, cal scrivea in lengoa Venesiana . Cognòselo altri sistemi?

GAXETA: E dopo ?
PANTO: Me pare el me volea sùito inte la industria de famejia. Ma mi voleo vànti tùto farghe védar ca a no xèro on fiol de popà invisià. Cusita me so trà sol software e go vìo fortuna. Gò goadagnà on fià, e me so cronpà la casa. Pì vanti gò asetà l’invito e co me popà anca la xè nda bastansa puìto.

GAXETA: Deso ?
PANTO: A sèvito far l’inprenditor, xè on vìsio de famejia, ma sa a pòso canvio ogni 2-3 ani, deso cogna esar flesibili, ghe xè gran movimenti inte el mondo. Mai inamorarse de on business.

GAXETA: Parchélo a politega, parchèlo l’apojio a Ghiotto.
PANTO: La politega o te la fè o te la subisi. Naltri Venesiani ghemo da riciapar el controlo sora el nostro destin, vanti ca a lo faga st’altri. Ghiotto lo gò xà dito, el xè on inprenditòr de suceso e no on falìto ca el sèrca carèghe. El xé in ganba, el xè studià, e el gà dele idee l’avangoardia.

GAXETA: A vostra, la me sa màsa de “mission impossible”.
PANTO: Purpio no credo , ghe xè in Rejion on elettorà xà de partenza intorno el 6% ca el xè gràn independentista e deso no el xè raprexentà. Ghemo on dover verso ste parsone. Inte el 2005, la xente no lo sa, ma, intorno Treviso me àmio Giorgio el ghéa catà su voti co persentual bùlgare , 15-20% de consensi , el primo partito, pì dela lega! Pecà ca co la so morte sto movimento el gabie perdésto tùta la so spinta propulsiva, e pa sta raxòn a me go invisinà al PNV.

GAXETA: Donca sol ca par sta ròba ?
PANTO: No anca parchè a gò catà gran spesor politego, programatego. A gò catà inovador e xente gràn parecià, xòvine e de livel àlto. El xé on “incubador” , in volta invese no vedo altro fòra ca nichilismo e slogan, ignoransa e “pansa”. Deso a se gà da laorar sol teritorio pa farse cognòsar mejo, pasar dala faxe virtuàl chéla de atività co le parsòne . A go notà segnal on mùcio incorajanti. A ghe xè on mùcio de intarese e vojia , a semo drio agregar on mùcio de pòpolo. La Venetia la se merita on partito cusita.

GAXETA: No gavìo mìa mài la tentasion de lasàr star ? O ca no sipia el momento giusto ?
PANTO: Co te si drio traversar l’inferno, mejio ndar vanti driti. Par via del momento, no te ghè da spetarlo, ma te ghè da crearlo. Finìa la segòna guera mondial i Veneti i xera poareti da far spavento. Fà el film “L’albaro dei socoi” . Me popà el me contàva ca scola i so amighi gheva la pelagra. Tuto chel ca a se vede in vòlta se lo sen fésto da nàltri soli. Gnisòn el ne gà jutà, al limite ne gà sfrutà. Deso basta. La bubana pai tajani la xè finìa.

GAXETA: Valtri sìo independentisti , la division no indebolìsela on stato?
PANTO: Fa a xé drìo ndàr le robe a se gà da canviar. L’italia la xè imobilista, seitando star rento sto carosòn co lori no susederà mai gnìnte; Lega Nord comprexa. Ghen da sganciarse, ghemo da canviar la pele. El serpente ca no canvia pele el more.

GAXETA: I ve acuxa de esar inesperti.
PANTO: I esperti xè chi ca gà na lànpara picà sol dadrio. Fa ciaro sol ca sol tròdo xà fésto. Pì vanti gnisòn el vede.

GAXETA: Ma no sìo mìa màsa idealisti ?
PANTO: Si, ghemo on sogno , de vedar la Venetia independente. Ma l’onego modo pa realixarli sti sogni, a xè de svejarse, credo. Se te dormi no te fe altro ca sevitar sognar.

GAXETA: Va bon, ma dognimòdo xèla na roba difisile , no credelo mìa ?
PANTO: A xè parchè no ghemo corajio de far na roba ca sta kive deventa difisile. E fia’ tuto chel ca existe el xè stà pensà da coalchedòn , politegamente intendo. Naltri pensemo coesto e ghe rivaremo, so convinto.

GAXETA: In Rejion no ghe xèli mìa màsa partitèli independentisti ?
PANTO: O se riunìmo o el pì forte scòa vìa st’altri. Vedarèmo. La me inpresion la xè parò ca el PNV el gàbia na marcia in pì e che siapia drio cresar e consolidarse. El fato ca un fà Gardin el se gabie asocià, a xe mucio significativo. Ramai sen el ponto de riferimento, l’onda monta , indrio no se torna. Sen forti, ghe la faren. Se st’altri ghe stà a li xé benvignù.

GAXETA: Sa xela la so vision politega?
PANTO: Pal XXI secolo speren de vedar on filoxofo bravo, magari Venesian ca el ne fasa on novo model de società, parchè el 900 el xè morésto. Intanto mi spère na fuxion tra on neo iluminixmo lixier e on catolisexémo iluminà . Se gà da rimetar al sentro la libertà dela persona, la so individualità. Ghemo màsa interfarénse , i vecioti dela cexa, i bigotti , i italiani ca li nega la nostra identità . Po dopo, la libartà la xè el fondamento dela nostra siviltà osidental. Ma mi a so anca credente ,vago mesa , inte la céxa a xè drio rivar dei preti xòvini in ganba , a so otimista, lori se riformarà so convinto . Cusì mi ano trào via la solidarietà, la solidarietà, la famejia e drìo co sti valori. Magàri a ghésimo vesto on De Gasperi, on catolego autonomista fà elo. Ma serve anca na injesion de anarchismo, kive te cati màsa culto dela personalità, màsa xente ca la vol desidar pa st’altri. Magari te pol catar on bravo ma ala longa el se monta el cào e el tàca fàr capèle. Ghemo la sindrome del salvador, del condotier . Mejio el model Venesian. Senpre pochi poder al singolo, se deside insieme co calma . Al di de ancuò el model svisaro el me par el pì puìto. Ma dognimòdo naltri a sen transversal, tuti onii pa l’independensa, dopo i Veneti fondarà i so partiteli de dreta e de sanca, o catòleghi.

GAXETA: Come vedelo el futuro del Veneto?
PANTO: Dela Venetia ? Splendido e Serenisimo !

GAXETA: Elora in boca el lòvo.
PANTO: Gavarìa caro de rispondarve co on dìto venesian, ma a no pòso ..

written by

The author didn‘t add any Information to his profile yet.
Related Posts