L’Incoronasion

Tólto da la GaxetaVeneta

Sto weekend go vio l’ocaxion de far do ciacoe co on insider de l’ase Lega-Pdl in Veneto. Co el 30% a testa sti do partii i se prexenta co na coalision da almanco 60%. L’elesion no la sarà altro che na formaità e la vera partìa par jori la se xoga a l’interno fra corenti rivali de special interests par come dividarse i apalti regionai.

L’incoronasion del candidà del centro-destra ala presidensa veneta la xe ła gran notisia de sto Nadal, ma ora de fine Marso, co che se vota par la Regione, i riscia de aver poca afluensa parchè el rixultà a xe dà par scontà.

Pitosto a ghe domando cosa che me sa dir del Pnv. El me conta che i sondaji i dà sto partitin a presapoco al 0,8%. Me spiaxe, a me dixe, sto giro gnisona caregheta par l’indipendensa veneta.

Par chi ca gà in mente altro che caregoti e scagni sto sondagio pre-canpagna eletoral pol senbrar na deluxion. Ma pensemoghe sora: 0,8% a xe 40,000 voti; vinti volte de pì dei voti ciapà ałe provinciali; quarantamila veneti che i vota ciaro e tondo par l’indipendensa veneta; on mesajo forte che pol eser la vera novità de sta primavera.

Alora sto Nadal, invese de magnarse el solito paneton dela politega taliana, parlemo a amighi e parenti de sta novità indipendentista. Intensifichemo el pasaparola cusì co che i vedarà a febraro i manifesti del Pnv i savarà cosa votare.

No stemo trar via el voto sigando par na incoronasion decidesta da signoroti al de là de l’Ada. Femo s-cioco confermando sto sondajo de 40,000. Rivemo anca a sinquantamiła: l’1% par la svolta. Dopo no ne ferma pì gnison.

Popularity: 1% [?]