headermask image

header image

El PNV el vol stipendi sicuri pai nostri dotori e infermieri

Setimana pasà a xe sucesa na roba alarmante. El Consiglio Regionale Veneto el ga decixo de no pagar el stipendio del 27 Xenaro a tuti i dotori de l’Ussl de Mestre (cuei de Padova e Trevixo invese si). I infermieri de sta Ussl invese i vegnarà pagà el 65% del stipendio. El personale aministrativo invese vegnarà pagà normalmente. Ne da notisia el Giornale de Vicensa. Catemo conferma so on comunicà de l’Ussl12 . On vergognoxo silensio dal resto dei media.

No xe na sorprexa che el stato talian ga finio i schei. Lo savévino che pa’l 2010 saria rivà el tracolo de sto stato in bancarota. Cuel che ne fa infotar xe che i primi a saltar i xe i servisi pi inportanti. Nel Consiglio Regionale i tira fora la scuxa che xe parchè no i ga gnancora aprovà on bilancio “provixorio”. I xe fora come on pergolo.

I nostri dotori e i nostri infermieri i ga bixogno de asoluta serenità lavorativa e asoluta sicuresa salariale. A xe on elemento fondamentale par el servisio de sanità ca ricevemo. Ricordemose che sto mexe tuti i dotori, dal reparto de pronto socorso in xo, i xe tuti drio laorar par la gloria, par on senso civico de servisio publico. I xe drio laorar gratis parchè sto stato parasita ga decixo de no pagarli.

Ormai l’indipendensa veneta la xe deventà na necesità urgente. Basta co sto sistema sanitario talian che mal gestise le nostre risorse privandone parfin de la sanità. Basta co na gestion piramidale e clientelare che favorise sprechi a scapito dei laoratori (dotori e infermieri) che presta el vero servisio. Pensè che su 2200 dipendenti a Mestre, 250 i xe aministrativi (coi stipendi intocabili). On raporto de 9 a 1 fra dotori/infermieri che presta servisio, e dirigenti/segretiarie che smisia scartofie a xe de na ineficensa mostruoxa.

Co no stato veneto indipendente gavaremo tute le risorse par pagar i nostri infermieri e dotori cuel che i se merita. Co no stato veneto indipendente i ospedali no sarà pì na fabrica de apalti par l’aparato politego. Co no stato veneto indipendente gavaremo on servisio sanitario de prima clase.

Chi ca laora ntel setore sanitario el sa puito che on parasita el xe l’ultimo a morir. Deso gavemo la conferma che sti parasiti i xe disposti a sacrifegar dotori e infermieri prima de tocar i so privilegi. Ma i xe furbi. i fa ste operasion a macia de leopardo par dar l’inpresion che sipia dei caxi ixolà. No stemo vargognarse. Dixemo a voxe alta se i ne ritarda i stipendi, se i taca no pagar le maestre, se no riva la pension par on “disguido tenico”. De sicuro no lo lexaremo ntei giornali (se no ghe salta el stipendio anca ai giornalisti). Denunciè al PNV le ingiustisie de sto stato italian, e ale Regionali de Marso 2010 votemo in masa par l’indipendensa.

Filipo Dal Lago
PNV

If you liked my post, feel free to subscribe to my rss feeds