headermask image

header image

No Dal Molin vol dir No Italia

Ne riva periodicamente via Facebook notissie dal Presidio Permanente No Dal Molin. I ne informa del pericolo par le falde aquifere, dei progeti de l’aeroporto a decòlo verticale, e de tanti altri ris-ci ambientali e acustici. Su staltro piato de la balansa ghe pol star anca sentimenti filo-americani, o el laoro che i ne riva coi apalti, e i posti de laoro che ne portarà.

La posission del PNV no la pol altro che esser contraria ala nova base militare mericana. Come grupo trasversale, sta posission no la se basa mia su considerasioni ambientali o pacifiste. E de sicuro la xe na presa de posission che la pol nar anca contro i interesi personali de nostri iscriti (dato che par tanti, noaltri inclusi, i laori al Dal Molin i fa la difarensa fra star casa disocupà e portar casa la pagnòta). El PNV no pol esser favorevole parché la xe stà na decision in violassion de uno dei nostri quatro principi.

No se pole far su na base militare in te na zona co alta densità abitativa sensa dimandar el parere dei citadini. No semo mia piegore da pascolo. El comune denominatore par un fronte contro la base el ga da esser el rispeto del volere dela citadinansa de Vicenza e comuni limitrofi. No pol esser mia le ragioni ambientali, geopolitiche o lavorative, che le xe ragioni che pol dividare l’opinion publica. El nemigo comune no xe mia i militari americani, che i gà come referente solo el governo italian. El nemigo a xe proprio el stato italian che ne trata come colonia da sfrutar, decidendo sensa dimandar parmesso de far su basi militari e centrali nucleari, e de espropriar terèn in nome dela “patria”.

Se no se rendemo conto de questo, e se fissemo solo su l’ambiente e su tematiche pacifiste, restaremo sempre divisi e perdenti, sucubi de na suditansa che no volemo afrontar, ma che xe ala fonte dei nostri problemi. Sventolaremo la bandiera dela pace de fronte ai cantieri del Dal Molin, savendo de perdare. E magari ora de elessioni votaremo anca PD (l’altra facia dela medaja de colonisassion). Li votaremo savendo de pèrdare, parchè in ciave centralista i tole sempre dele decisioni che no rispeta le nostre problematiche tratàndone da parco boi. Se no xe i candidati “foresti” catapultà in Veneto, a xe dei poster eletorali pietosi (quei co la drogata, el pedofilo, e la sioreta pena vegnù fora da un cinema d’autore). Magari i va ben par ciapar voti a Bologna e Roma, ma i xe na riceta par pèrdare in Veneto.

A ghe vole un fronte trasversale veneto parchè le tematiche che ne interessa (ambiente, laoro) le xe tematiche de interesse locale, e no de ideologie transnazionali. La campagna par na politica solidale lassémola ai impresari de partito italiani, parché par un eletore veneto “solidarietà” vol dir farse fregar dale scarsèle  €4000 ogni ano (come spiegà qui, quo e qua, ma anca que e quu).

Se no se organizemo co un fronte politico trasversale veneto, che no xe na filiale de qualche partito italian, subiremo sempre i pezo abusi ambientali (Dal Molin, centrali nucleari), economici (dotori e maestre sensa paga, e pensioni sempre pì distanti) e culturali (veneti=padani). Mi sto fronte politico trasversale veneto lo go catà: el se ciama Partito Nasional Veneto. El bate on tasto, quelo de l’indipendenza, che par tanti el xe un tabù masa grosso. Utopia? Forse, ma mi no vedo alternative.

Filipo Dal Lago
P N V

If you liked my post, feel free to subscribe to my rss feeds