SOSIALIXASION DEI COSTI E PRIVATIXASION DEI PROFITI

Tólto da GaxetaVeneta

La Fiat gàla de bexògno de risercadòri? Gnisòn problèma, el stàto taliàn (co i nostri schèi) pàga racoalche sentenàro de risercadòri rènto le oniversità ca li fa resèrca pa le nesesità de la càxa automobilistega de stàto. Volìo la pisìna pùblega pa noàr sol vòstro Comùn? Gnisòn problema, el sìndaco e i so asesòri li dopararà el bilànso Comunàl pa construìr na pisìna o na palèstra ca la vegnarà regalà in jestion a la solita srl o asociasiòn sportìva privà. El sòlito inprexàrio construtòr de paéxe, gàlo de bexògno de infrastrutùre pa el nòvo sentro comersiàl o palasìna ca el ga tirà sù? Gnisòn probléma, l’asesòr ai laòri pùbleghi el dopararà i schèi piòveghi pa far na rete de infrastrutùre sòto la òxe “utilità pùblega”. Benettòn vòrlo nàltro tòco de autostràda sòto càxa sòa? Fèmoghe la Pedemontàna coi schèi piòveghi e dòpo ghe la dèmo in jestiòn fàndoghe ciapàr i schei dei pedàji ca naltri paghemo pa ndàr so la strada festa coi nostri schèi! Gavio da jutàr on amigo vendar le jasense de magaxìn : aredaminti, màrmo, recinsiòn, lanpiòni….? Gnisòn problema l’asesòr o sìndaco de tùrno co la scùxa de l’”utilità sosiàl” e ve li cròmpa. La paròla “utilità sosiàl” la xè deventà sìmile a chéla “sicurèsa” pa justifegàr de tùto. A xè isteso discòrso ca i fà co li vol ciapàr fòndi e apàlti pa ristruturàr on relìto òrbàn piòvego e i se scònde drìo la paròla “edifìcio stòrego”, e i se inventa rèti muxeàl, stòrie consà, pa justifegàr apalti e spexe milionarie.
Tùto sto lengoajo, sto politeghexe, el ga na sòla funsiòn : sosialixàr i còsti e privatixàr i profìti. Chi ca a fa i profìti, el ga fìn el coràjo de vantàrse de èsar on gràn statìsta o capitalìsta, co invèse a se tràta de na fòrma ca de capitalìsta no la ga gninte ca védar. La richésa de Berluscòni e de la stragràn majorànsa dei gràn ricòti la xè el frùto de sto sistema clientelàr ca no ga gninte ca védar co el lìbaro marcà, ansi.

Popularity: 1% [?]