Matrix o sindrome de Stocolma?

Dopo do dì ke xe pasae łe elesion, ła me sensasion ła xe proprio de vivar su un regime novo, de tipo moderno, subdoło, inpalpabiłe. Xe soło ke sensasion, ma cualcosa forse łe se porta drìo. Łe se faxeva strada in sti mexi, scoltando xente par ben. Patrioti Veneti, intendo, no mone. Xente ke gà pagà anca co ła galera pa łe so idee. Co gò visto ke anca cualcun de łori se acomodava nel placido oviłe del vołemose ben verde padan, a gò scumisià a capir cualcoseta de pì. Se stemo interogando internamente come PNV (ma penso ke anca altri i sipia drìo farlo), pa capir ben ła strategia da adotar nel cuadro ke xe vegnùo fora. Ma poso dir ke ghe xe trati novi e inediti.

El nostro presidente emerito (che ancuò el conpie i àni: auguri!) ieri, comentando i rixultati dełe elesion, el se domandava:

“Ma perché la gente continua a fumare, anche se sa che fa male??” “Perché la gente continua a votare partiti che vogliono rimanere in ITA, anche se sa che ITA si pappa la metà dei nostri onesti guadagni??”. Sembrano domande banali, ma non lo sono.

Benvegnùi a Matrix, siore e siori. Cuà xe vegnùa fora na roba ke gà del’incredibiłe. Basta metar un bravo toxo (poso dir ke de mejo no ghe ne xe, par mi), na facia neta, inpenirghe le strade co ła so muxagna e de colpo sparise tuti i problemi. Son sincero, co gero in cabina eletoral, me gera vegnùa voja de votarlo anca a mi! Ma a gò tegnùo duro e gò votà PNV e l’indipendensa del Veneto, insieme a meliari de altri veneti ke gà fato come mi, ke gà inisià ła rexistensa contro el stato kel mete kuà na facia beła e neta par tegnerne boni e kieti.

Ła reasion deła xente co ke te spieghi ke ogni dì i ghe roba almanco 10 euro, sensa kei se ne acorxa, xe de spetar, ke deso cualcosa canbiarà. Ansi, co te ghe spieghi ke tuti semo speransoxi ke cualcosa canbie, ma ke forse iuta el canbiamento el far saver ała xente cuanto ke i ne oprime, ałora i te dixe ke intanto xe ben taxar e incroxar i dei. Deso gavemo el Salvator.

Me par l’ategiamento del prigioniero ke scumisia a inamorarse del so carcerier. Gavè prexente cueło ke dixe ke insoma, puareto, anca el carcerier magari el gà buo na infansia difisiłe, magari el gera sfrutà al lavoro, ke in fondo el xe bon. Ke convien tuto somà darghe fiducia, parké se stemo boni el ne tratarà mejo. Xe el pasagio psicołogico sucesivo a cuei ke diceva ke no podemo diventar indipendenti, sinò, poareti, come fai i tałiani sensa de naltri, kei noi gà gnente? Morei de fame?

Ło steso xe deso, no convien far inrabiar el Salvator, dovemo esar tuti unii co łu. Deso łu sì kel farà ła voxe grosa co Roma. Deso sì ke riva el federałixmo.

Ałora mi no ghe stao, siore e siori, mi ałora deso ło digo ciaro e tondo. Mi no me va ben ke i me robe 10 euro al dì. Almanco ło digo forte e ciaro.

Cusì almanco fra un mexe, do mexi, un àno, tri àni, co ke el Salvator el tornarà a man vode da Roma (come ke succede da 20 àni a sta parte), almanco i podarà darne ła colpa a naltri, ke no ło ghemo sostegnùo.

Binbari deła Buxa

written by

The author didn‘t add any Information to his profile yet.