PLEBISCITO.EU | PNV. Press News Veneto

Dopo el pasante de Mestre, el prosimo grande progeto par la viabilità veneta a xe l’autostrada Pedemontana che da la A4 pena prima de Montecio la va sù a NordEst verso Thiene, par poi proseguir verso Basàn, Montebeluna, fin a conéterse co l’A27 a Vilorba.
Pai abitanti dela valata de l’Agno (come noialtri do autori de sto articolo), che da deceni i brontola de na scarsa viabilità par una dele xone pi industrialixà del teritorio veneto, poder entrar in autostrada a Castelgonberto xe sicuramente vantagioxo. Na vena autostradale pedemontana la gà de sicuro na fraca de aspeti poxitivi. Basta pensar che le do province interesà (Vicensa e Trevixo) le gà na popolasion de 900mila abitanti a testa, e dei capoluoghi da 100mila abitanti scarsi. Vol dir che la stragrande magioransa de Vicentini e Trevixani i vive in ste xone pedemontana sensa no sfogo autostradal par stropar el trafico locale.
Bon, sotolineà el nostro parere favorevole a investir su infrastruture de viabilità, pasémo a cos che no va mia. In sintexi: a) no ai espropri; b) no ai caseli; e c) no ai pochi svincoli.

A. NO AI ESPROPI

A parte che cavar via proprietà privata a citadini in nome del “bene comune” se ciama robàr, a xe anca contro uno dei principi del PNV. El stato Italia giustifega sto sistema feudale co la scuxa che sensa esporpri no se podaria conbinar mai gninte. No ghe xe gninte de pì falso. Ghe xe paexi pì civili che fa tante pì strade e opere publiche rispetando i propri citadini. El stato veneto indipendente somejarà de pì al sistema svisero o merican pitosto che a cuelo iliberale e opresivo del contenitore Italia. In Svisera i xe boni de far tante pì strade e tunnel tramite referendum locali co el rixultà de aver sistemi autostradali pì eficenti, pì rispetoxi de l’anbiente e dei diriti dei propri citadini, e che vien conpletà tanto pì in presia del pachiderma de apalti italian. In Merica, che no i xe secondi a nisuni in fato de asfaltar e costruir, no i se sognaria mai de far n’esproprio. Ogni volta i contrata coi paroni de tuti i tochi de tera par cronpar a preso de marcà. Dale volte se paga tanto e dale volte te cati chi ca no vol vendar a nisun preso. In sti rari caxi i ghe và anca intorno.
De sicuro standoghe rente ale legi de marcà, chi ca vende xe par forsa sodisfato (se no no vendaria). Invese, ntel caxo de Montecio, gavemo caxi de xente che ncora no xe stà pagà pai espropi fati do ani fà par na trata preliminare de sta Pedemontana. Ghe xe caxi de xente co on teren cuadrato, e el stato che ghe espropria solo che na strica diagonal, lasàndoghe do triangoleti sensa valor. Sta chi se ciama rapina, e el PNV xe asolutamente contrario a ste violasion de la proprietà de citadini veneti. Naltri semo par far le robe, ma se gà da farle ben. Xe posibile, e ansi, fando co coerensa se fà anca mejo.

B. NO AI CASELI

Far caseli xe na ulterior devastasion del teritorio che no serve a gninte. A parte che dovaria eser gratis (dato che la vien costruia coi nostri schei), ma anca se se vol far pagar, i caseli xe on sistema aretrà, italian, da secolo pasà. Vardemo par exenpio in Austria, lori i ga on sistema de pagamento automadego tipo telepass. Te si libaro de entrar e usir, e a ogni cavalcavia ghe xe on sistema che te controla se te ghè pagà. Se no te ghè pagà, te riva na foto caxa. E el vecioto co le monetine in man come falo? El va dal tabacaro anca lu e se cronpa uno de sti pass, come che cronpa i boni pasto pai nevodi che và scola. Evitemo de sercar scuxe fantaxioxe contro le idee bone. Se uno no xe bon de cronparse dal tabacaro on pass par l’autostrada, no’l dovaria gnanca ver la patente e guidar in volta par le nostre strade.

C. NO AI POCHI SVINCOLI

Evitando i caseli, podemo anca permetarse de aver pì svincoli. Ricordemose che sta autostrada la serve par solevar el trafico locale. No la serve par el caxo raro de cuelo che da Montecio el ga da nar a Vilorba, ma serve pai mejari de pendolari che ogni dì i se fà la trata Montecio-Thiene, o Thiene-Basan, o Basan-Montebeluna, o Montebeluna-Vilorba. No xe posibile che par ste trate locali ghe sipia solo che uno o do svincoli, se no se dixincentiva el trafico local a doparar l’autostrada, e la pedemontana la deventa naltro monumento publico inutile come la valdastico, a parte pai camionari che va da Lisbona a Kiev. Ghe vol entrate pì frecuenti, anca sensa cavalcavia par far n’entrata paralela in senso oposto. Gà da eser n’autostrada pensà come na superstrada pa’l trafico locale, anca se la gà le normative de sicuresa da autostrada (corsie pi larghe, corsia de emergensa, esetara).

In concluxion, el PNV xe a favore de infrastruture par la viabilità locale, purchè le sipia fate par smaltir el trafico locale e dar solievo a l’anbiente (ridur el viajo ai pendolari). El PNV se mete par traverso contro i espropi condoti dal stato italian. Xe na vergogna orenda, che podaremo risolvere solo co l’indipendensa de lo stato veneto. Solo alora podaremo nar vanti co le nostre infrastruture rispetando el citadino, e mantegnendo na eficensa superiore come in paexi civili tipo la Svisera e la Merica.

Lodovico Pizzati – Claudio Ghiotto