headermask image

header image

Ocio le asioni bancarie

Tólto da GaxetaVeneta

In sto articolo se riporta l’esperiensa personal de pensionati che no riese vendar le so asioni bancarie.

In sti ultimi do ani turobolenti pai investimenti finansiari, a xe rimasti saldi do pilastri de sicuresa pai sparagni dei nostri veci: obligasioni del stato talian (BOT e BTP) e asioni bancarie taliane.
Le obligasioni de stato le ga perso el sto status ntel 2010 par via del straindebitamento del stato talian e dela crixi greca. Solo i pi inbatunii che varda solo Rai e reti Fininvest li tien ncora in man. Chi che lexe la stanpa foresta el sa che xe robe a alto riscio e da starghe distante parche’ radioative come la porcaria greca.
Rimane pero’ in pie on mito: le asioni bancarie. Anca i investitori pi sgama’ i se sente sicuri co le asioni de banche taliane, anca parche’ el sistema bancario talian el gode de na reputasion internasional de ver rexistio ala crixi mejo de staltri paexi. Sta ista’ taca crolar anca sto mito.
Chi che ga asioni bancarie el ga on falso senso de sicuresa ogni volta che ghe riva caxa l’estratoconto che ghe dixe che el valor dele so asion no ga perso valor come tuto el resto ma ansi el xe drio nar su. Pultropo sti valori no i xe veritieri. Speso ste asioni no le xe vendue sul marca’ asionario, ma solo internamente (te vendi ala banca e te riconpri dala banca) che vol dir che la banca stesa la fa da intermediaria par tute le so tranxasion. Se dele banche pi grande le xe cuota’ in borsa a Milan, savemo tuti che se trata de on “marca’” par modo de dir. Par ver na idea de valor de marca’ de asioni ghe vol on gran volume de vendite e de acuixision, se no se trata de numari artificiali.
Par exenpio, na banca la pol periodicamente vendar e cronpar asioni de se stesa par volumi basi, tipo de 5000 o 10000 euri. Ste vendite de baso volume le vien fate a presi alti, cusi i asionisti co sentenari de mejara de euri, o adiritura co milioni i ga on falso senso de sicuresa che el so investimento a lungo termine el xe drio tegner bota ala crixi finansiaria e adiritura nar su. In sta maniera no ghe pasa gnanca par l’anticamara de la crapa de vendar.
Pultropo la dura realta’ la capita co che calcheduni el ga da vendar. Sta chi la xe l’esperiensa personale de na pensionata co asioni nte na banca del triveneto:
-On mexe fa la da ordine ala banca de vendar le so asion, no parlemo de milioni, ma gnanca de diexene de mejara de euro.
-La banca la ghe spiega che no xe on ordine che se pol atuar in pochi di come i fondi de investimento che i vien vendui nte on marca’ asionario. La vendita la avien internamente e ghe vora’ on mexe.
-La pensionata la da ordine de vendar co valor de 10 cent soto el valor de marca’.
-Dopo on mexe la banca la informa la pensionata che no xe sta bona de vendar a cuel volume, pero’ el preso uficial dele asioni el xera senpre al de sora.

Chi che ga xuga’ in borsa el sa che no senpre i ordini de vendita i va in porto, e che pi grando el volume, pi baso se ga da metar el preso. Pero’ in borsa ghe vol pochi secondi par saver, e se pol xustar i presi instantaneamente e al masimo in pochi minuti se riese vendar a on preso che deventa el novo preso de marca’. Ma co le asioni bancarie che NO LE XE VENDUE SUL MARCA’ e che i se la ciapa comoda (on mexeto) par far la tranxasion, el valor dele asioni bancarie no’l xe mia veritiero. In paexi civilixa’ le asioni bancarie le vien vendue sul marca’ asionario e xe par cuesto che in altri paexi le banche le ga ciapa’ na bela paca come el resto dele asioni cuota’ in borsa.
La raxon par cui le banche taliane le da on falso senso de sicuresa xe parche’ i presi dele so asion no le xe sul marca’ e te fe’ fadiga vendarle se te ghe provi. Pena che par necesita’ i nostri pensiona’ i taca proar vendar i se inacorxara’ del vero valor de ste asioni e sara’ el prosimo castelo de carte a petar xo, co on paro de ani de ritardo su la crixi scominsia’ ntel 2008 in paexi co on sistema finansiario trasparente.

Filipo Dal Lago

If you liked my post, feel free to subscribe to my rss feeds