GRAVE ATACO ALA AUTONOMIA DEL TRENTIN

A so restà stuà e cogna dir anca na scianta infastidì a catarme a soita fastidiosa bandiera tricolorata inte on report de on paro de pazene sul Corier dea Sera de sabo scorso 21-8 a firma de Gian Antonio Stella.

Xè da on toket che li continua ciorne par jiro co sto montar de vojia de Italia unita in vista de sto 150-esimo de l’Unità che noialtri veneti ne lasa indifarenti del tuto ansi noialtri no festejien gnanca parkè el 1861 xè roba par lori tajiani visto che el plebiscito trufa de nu xè inte’l 1866.

Ma coel che me gà dato pì alarme, xè sta sto ataco, sta pugnalata infamante ale spale dela autonomia del trentino.

Li acusa Dellai, el Presidente dela Provincia de Trento de portar par Hofer e no pa Cesare Battisti e de ver spendù risorse pa farlo.

La notisia la gà scatenà la reasion indignà dei medhi de informasion trentini e so tuti i cuotidiani e television locai, jieri 22-8 coesta xè stà la notisia da prima pazena, ma no dela popolasion che par bastansa indormensà e perdesta drento i fati soi.

Se gà tratà comunque de na canpagna ben orchestrà de delegitimasion indò i media tajiani li ga doprà argomentasion adiritura false.

Tanto pa scomisiar li gà scrivest che el stato Italia el ghe dà skei ai comuni trentini che no xè vero par gnente, no ghe riva gnanca un euro, roba da lejienda metropolitana!

E riguardo la Provincia de Trent no xè vero par gnente che la aministra pì fondi dei coeli versà dai trentini cole tase. Par questo l’economista prof. Pizzati gà fato na acurata indagine che se pol catar kive ( LINK) e noilatri veneti del PNV saven ben che coel che dixe Dellai a sò difesa xè vero dal bon, e pa sto motivo ghe demo la nostra masima solidarietà.

El PNV xè e sarà senper favorevoe ala autonomia e/o independesa de chealtri popoli, no xè negando l’autonomia de kealtri che se concoista ea nostra.

E riguardo ai comuni veneti secesionisti fen altro che ribadir el nostro pensier : masima libertà de ndar dove che se vol, se fendo cusita li pensa de salvarse, bon chi pol farlo chel se salvia pur.

Intanto no esitemo a definir l’articolo del Corier dea Sera gnente altro che disinformasion, nasionalismo italian del pì vològar de stanpo tardo risorjimental. che li vuria far pasar el popolo trentin cofà privilejià, mantegnesti da Roma, su la base de falsità storeghe.

Sto ataco no xè par gnente casual ma el xè parte de on disegno che ponta a disgregar el fronte autonomista trentin che el xè on faro e on riferimento ma che a 65 ani dala so istitusion scumisia deso dopo tanti ani de tricolor, carabinieri e sportivi trentini senpre pronti a sventiolar el bianco-roso-verde a ver segnali de debolesa ideolojica e donca el nemico sentralista se sente pì forte e scalda i motori pa cavarghe ai trentini parte dea sò autonomia o almanco pa rosegarghela na scianta.

Li capise che l’Europa dei grandi stati la xè drio sfregolarse e posto el fato che la provinsia de Bolsan co tuto el sud-tirol drento on scenario de sto tipo la sarà persa pa definision, li se consentra su Trento, col intento de tegnirsea streta e de spuar sangoe vanti da asarli ndar via co staltri in on novo neo stato tirolese de no distante istitusion.

Contenporaneamente anca la ciesa la capise ste dinamiche e Angelo Bagnasco,Presidente dei Vescovi Italiani, se lasa ndar andar a considerasion che le par anacronisteghe del tipo “la molteplicità culturale è una ricchezza se costruisce l’unità”: me par contraditorio.

Se desmenteghelo elo  che in trentin el xè stà purpio Alcide de Gasperi, el pì catolego dei catolisii, tanto che li vuea anca farlo santo, a salvar l’unità del tirolo ala Italia par via de na straordinaria asion de concertasion politega vegnesta fora coi acordi del 46.

Purpio el 19 de Agosto ricoreva el so aniversario, de De Gasperi, intendo.

Epur par distanti coei ani del 45-48 indò a Trento ghe jiera el movimento politego ciamà “Asar” (Associazione studi autonomistici regionali) che el contava adiritura 115 mila iscriti sora na popolasion de 380 trentini, roba da scioco.

Sto movimento el se doparava pa portar vanti “l’autogoverno con ampi poteri legislativi ed esecutivi in tutte le branche dell’attività politica, economica, sociale”.

E in coeli ani ghe xè sta donca na straordinaria e capilar potenza  popolare che gà influensà la politega fin portar ala concoista pai trentini de na fortisima autonomia, no sol che na medha  independensa ma na independensa coasi piena dal stato Italia, dixemo del 90%.

20 mila persone in piasa el 15-9-46, 30-mia el 20-4-47!

On movimento politego che ga vesto ela so continuasion che deso catemo inte’l Patt (partito autonomista trentino tirolese) col cui partito de Dellai (Allenza per il Trentino) se continua a paciolar de posibie fusion.

Ma del vigor e dela forsa inteletual e teritorial de coei ani cosa xelo rimasto ? Bastansa poco.

On Dellai che parla lu lu sol,unico baluardo contro tuti de on autonomismo in declino de idee, solo  co coalche aparision sul TGR e sol cotidian l’Adige che xè lexest sol che dai veci e gnanca da tuti i trentini.

Eo steso par vecio e straco, e ghe piaxe incora definirese “europeo e italiano”, co na vision sinistrosentrega che la ga senpre paura de vegnar fora dal so guscio e de diciararse independentista, se necesario.

Pa no parlar dei blog dei do partiti li xè de on fiaco grando, in confronto col blog del PNV li dovaria far sciochi e sciantisi, invese, nel era internet e facebook li xè fà l’inverno nuclear.

Pal momento gnente zoveni indipendentisti al orizonte, gnente de novo e cusita el nemigo se sente pì forte e conseguentemente l’autonomismo, senpre pì debolmente sostegnuo a livel de inteletuali, vien meso soto scaco.

Mi ai trentini ghe digo :” ma cose gaveli porta i tajiani a vu ?”

La prima guera mondial co le so devastasion e el drama dei profughi.Dopo xè rivà altro che ocupasion, stile – da botin de goera- e col fasismo xè rivà anca l’otica del nasionalismo e la prevaricasion del regime.

In sta fase par na forsadura el riciamo de Stella a Cesare Battisti, che seguro xè sta na figura ciave del irredentismo ma che el lotava pal on trentino fora dala sciavitu austriaca ma de seguro no gheva l’intension de consegnarlo a nantro colonisador.

Bastaria vardarse in casa  sensa dar tanto par volta, basta catar fora da novo e rifrescar coel desiderio de fuga dal sentralismo puito interpretà dal Asar del tenpo co inesti ideologici ciapà in prestio del mejio spirito federalista e anti-militarista de coei ani, grasie ala presensa de fervidi inteletuai cofà par dir Valentino Chiocchetti.

No desmenteghemo gnanca che inte’l 1944, durante l’ocupasion de facto nasista del trentin ciamà -­alpenvorland-e  jiera nasest el “Comitato di indipenza trentina” i cui esponenti xè finii in canpo de consentramento.

Deso Tremonti se parecia a desmontar sta autonomia trentina e manda vanti i guastatori avanguardisti su jiornai.

Ma le mase anestetixae da ferie, ciesa, carabinieri, jornai,teatrini televisivi, Francesca Dallapè e Tania Cagnotto, taxe.

E deso fen ke ? Lo digo anca nel me interese de veneto independentista.

L’atonomismo trentin xè in crisi parchè manca sircolasion de idee in on marcà ristresimo che no riese a far na masa critica sufisiente.

Ghe xè na mancansa de inpegno politego e sivico dei zoveni che, conplice na sinistra inspiegabilmente incora filoitaliana e on catolicesimo obsoleto li ingabia rento dei contenidori che no li produse gnente de novo fora dai soliti schemi e jerarchie precostituie.

Saria on pecà che no ghe fuse nel futuro de sta provincia nel medio termen la rinasita de nove forse politiche sociai e culturai in grado de ciaparse on riscato e rivedhar el trentin ala modernità.

Forse na scianta de spirito zovanie ribele e scapigliato podaria portar calcosa de novo, magari co l’aiuto dela tecnologia e de internet, pa favorir e anplificar la libera sircolasion dele idee nele vali.

Concludo : Cesare Battisti no sentra gnente, asen star par favor fati del 1917 che deso el mondo canvia in 3 mesi, caro Stella cosa catitu fora robe de sento ani indrio.

Pitosto dixo che a noialtri ne interesa par davero del destin dei trentini, che li posia verlo inte le purpie man, catando fora anca lori el  corajio de dirghe no ala colonisasion dei foresti, na olta par tute.

La storia e la politega no se ripete mai. No so se ghe xè le condision pa rinovar el spirito e la forsa de 60 ani indrio. Ma no ghe xè alternative se no se vol cascar drento el declino del sentralismo.

Forse xè rivà el momento par Trento de abandonar definitivamente l’autonomismo a favor del independentismo, se necesario, in ciave europea, fà Scosia a Catalogna, co pì corajio e co pì determinasion.

Gianluca Panto
Segretario  PNV
23-8-2010

written by

The author didn‘t add any Information to his profile yet.