headermask image

header image

Riunione dei Genitori

Ieri sera son nda’ ala riunion dei genitori ala scola media de me fiolo.

Le profesorese le spiegava che nte la clase de me fiolo no ghe xe bastansa solidarieta’ e ghe xe invese masa individualismo. Par far dei exenpi, la profesoresa la spiega che co che la interoga on studente su na poexia staltri studenti no ghe da sugerimenti de scondon, opure che no i se pasa bijetini durante el conpito. El discorso vien sotolinea’ tacando far exenpi dela tragedia in Giapone e come che tuti se da na man  in gran solidarieta’.

A sto punto mi interonpo parche’ me par masa sentir dei profesori dele medie che i se lamenta che i studenti no i copia, faxendo on paralelo co l’exigensa de solidarieta’ pai teremota’ giaponexi. Interonpo anca parche’ xera prexente el raprexentante dei studenti e me pareva na discusion tanto dixeducativa. L’epixodio se ga concluxo co la profesoresa pi sgaja che ga fato marcia indrio, mentre on paro de altre le ga serca’ de difender la so poxision Ala fine ghe xe sta on silensio total sia fra profesori che genitori come dir: “sto chi l’e’ semo patoco, asecondemolo”.

La morale che i voleva insegnar la xera: gavi’ da darve na man copiando deso, parche’ se no, vegni’ su egoisti nte na soceta’ che xa de suo la premia l’individualismo.

Mi no go gnente contro la solidarieta’, ma se te voi forsarli a interesarse del grupo invese de se stesi, te poi farghe far lavori de grupo co voto coletivo. Lo faso parfin mi co serti exami a l’universita’, ma ghe xe anca dei corsi de management che proprio par curriculum i baxa el voto individual so la performance del grupo de laoro.

Xe tuto nantro discorso vole insegnar sta solidarieta’ contro l’autorita’. El colmo xe l’autorita’ stesa che la protesta parche’ i studenti no i serca de inbrojar (in maniera coletiva pero’! se no alora no). La lesion de vita che le prof dele medie le vol inpartir xe che se ga da far scuadra contro l’autorita’, e sta lesion la xe indicativa de come che vien percepia l’autorita’. L’autorita’ no xe calcosa che te apartien, la xe calcosa de inposto da l’alto che no fa del to ben: la xe in efeti on stato che te tasa al 70% e te da indrio 4 fregole de servisi; la xe on stato centrale che te inpone da distante dele regole, che no le riflete el volere dela to comunita’. Insoma a xe on conportamento tipico de na soceta’ che la subise n’autorita’.

Se xe on conportamento pi acentua’ in meridion a xe probabilmente parche’ i ga secoli de alenamento indove l’autorita’ la xe senpre sta foresta (normani, arabi, spagnoli, taliani), e la vera forma de governo da rispetar e da difendare la xera cuela che manovrava de scondon. Anca se no gavemo memoria de na situasion difarente da l’atuale, no xe cusi in volta pa’l mondo. Ghe xe posti (vedi Danimarca) dove l’autorita’ la xe vista come on prodoto dela comunita’ stesa, e nar contro le regole a xe come tradir i to fradei. Mi durante la Serenisima no ghe xero mia, ma dal poco che go leto me par proprio de intendare che ghe xera apunto on raporto difarente co l’autorita’ che gavemo deso (e no credo de far el nostalgico o de ver na  vixion romantega dela republica veneta). Credo che naltri veneti fin poche generasioni fa xerimo abitua’ a ver on rispeto par le regole, par lo stato, parche’ el xera on prodoto de naltri stesi. Deso, pian pianelo, anca par soravivensa semo drio bituarse a conportarse come staltre soceta’ che le subise da secoli n’autorita’ foresta che no ne apartien. E le nostre prof. le xe drio insegnarne ativamente a deventar dei bravi taliani: va ben far de scondon contro le regole, basta no farve becar e sora de tuto solo se co spirito coletivo.

Lodovico Pizzati – Veneto Stato

PS. Se da sto me discorso ve paro semo patoco, ve rimando a Michele Boldrin su nFA.

 

If you liked my post, feel free to subscribe to my rss feeds