Lega Taliana

Ca’ Corner a xe uno dei pi inportanti palasi sul Canal Grando, situa’ pena dopo el ponte de l’Academia nando verso San Marco. A xe on palaso sincoesentesco progeta’ da Jacopo Sansovino e xera la dimora pi prestigioxa dela fameja Cornaro, che la ga da’ a Venesia ben 4 dogi e anca la principesa de Cipro, Caterina Cornaro.

Anco’ pultropo sto palaso el xe la sede dela Provincia di Venezia, apendice aministrativa del stato talian in Veneto. El vasalagio dela Provincia di Venezia verso el governo roman el xe in man a na aministrasion leghista, vota’ in grandi numari dala popolasion venesiana.

Sta aministrasion leghista la ga vuo la pesima idea de piturar de tricolor, co dei fari luminoxi, on dei sinboli architetonici de la Serenisima. No so valtri, ma par mi el tricolor el raprexenta el colonialismo talian che ne ciucia miliardi dele nostre risorse ogni ano, e par mi ver l’inisiativa spontanea (unica in tuta Venesia) de far on monumento vixivo a “schiavi di Roma… siam pronti alla morte” el xe el rifleso de on servilismo mentale che naltri veneti proprio no se meritemo, ne dal punto de vista artistico, ne da cuelo politico-economico.

Se ga da ver el salame ntei oci a voler incolpar sto talianismo leghista a altre cauxe (“la Donazzan ci ha costretto”). Dar el voto ala Lega vol dir acetar el sistema feudale de vasalagio verso i paroni xo a Roma. Votar Lega xe on ato contro el ben del popolo Veneto e chi che ga la cosiensa a posto el ga da molarghe e el ga da darse da far in maniera ativa a far saver ai so cari, ai so amici e conosenti che na alternativa la ghe xe: Veneto Stato, e no se pol far de manco.

Lodovico Pizzati – Veneto Stato

written by

The author didn‘t add any Information to his profile yet.