headermask image

header image

Letara ai xornali sensurà parché scrita in Veneto

A me prexento:

A so Raffaele Serafini el studente ca el xe sta sospendesto da le lesion pal solo fàto de rivendicàr on dirito sivil tutelà da la costitusion taliana traverso l’inecoivocabile artigolo 3. Premeto, ca no go mai ofendesto el profesor Silvestro Moro co parolase (cosa ca lu el ga festo pi olte frente la stesa diretrise de la scola, Natalia Vivian). La discriminasion del profesor Moro la xe de natura politega e preconseta. Pi olte durante le lesiòn el ga festo comenti de natura politega e de ridicolixasion de la Lengoa Veneta. Mi e tuti st’altri studinti (ca semo tuti dixocupà e maùri de àni) a ghemo senpre taxesto par paura de ritorsiòn. Tignì prexente ca i profesuri li ne serca la fàbrega ando far el stage final e li ne exàmina a la fin del corso; in parole scète: a semo ricatabili e ghemo senpre vìo paùra, ma sto discorso no vol dir privarne dei nostri diriti inalienabili e xminuìr la nostra identità lengoistega. Scola ghe ga da èsar rispeto pa i diriti fondamentàl de la persona. Semo dei dixocupà co dificoltà de integrasiòn vista l’età, ma ghemo el dirito de èsar rispetà sensa favùri o privileji rispeto gnisòn. No dimandemo limoxine ma rispeto fa individui. No toleremo insulti dai insegnanti o derixiòn.

I fàti in detalio li xè ilustrà a sto link:

https://www.pnveneto.org/2011/04/rasixmo-antiveneto-scola-testimoniansa-de-on-etnosidio-moderno/

No go bexogno de contar buxie e sotoscrivo, cosa ca el profesor Moro e la diretrise no li ga el corajo de far, sercando de deviar e scondar la verità. Provo solo pena par lori ma li xe el prodòto de on sistema ca no el ga el coràjo de le so asiòn e frente la responsabilità el se conporta fa i taliani, l’8 setenbre insegna.

Inte la me vìta no go mai discrimenà on individuo pa la lengoa ca el parlava, a go studià na 20 de lengoe, go studià in 4 oniversità, go viajà inte na 50 de stati, go laorà, go festo l’emigrante, a go senpre amà e rispatà la diversità e vedesta fa na richesa incredibile ca la va coltivà e mantignìsta, go juta mori xàli e ciàri e lori me ga jutà, li go rispatà e go sercà de inparàr da luri, ne me go mai sognà de mancar de rispeto a na parsona pal solo fato ca la parla naltra lengoa o na lengoa difarente da la mea, ansi la go valorixà, ma al steso tenpo go senpre pretendesto resiprosità, la baxe de l’ogoaliansa.

Putropo da 145 ani, partir da l’invaxiòn taliana de la Venesia, a semo sta vìtime de on etnosìdio lengoistego ca partir dal fasixmo, el ga ciapà l’ànda de na goèra santa contro la diversità. La italia la xe sta protagonista de etnosìdi e jenosidi in “pàtria” (Sardegna, Veneto, Friuli, Sicilia) e fòra (Balcani, Nord Afrega e Corno d’Afrega) pa on totàl fra on minimo de 600 mila sivili masacrà pa raxòn nasionaliste e on màsimo de 1 miliòn. Sta storia la xe in parte sensurà e scòmoda da contàr, ma chi ca ga coràjo e onestà la pol studiàr. I Veneti i xe sta vìtime de sta politega ignorante e rasista ca li ga costreti spojarse economegamente e identitariamente co la distrusiòn de la memoria storega, de la lengoa, de le so tradisòn. Tùto in nome de on nasionalixmo orbo e fanatego culminà col jenosìdio ebràego e l’adexiòn ale leji rasiàl naxiste. La republega taliana la ga ricalcà le orme fasiste in mòdo silensiòxo e la ga par consuetudine, violà la stesa leje costitusional in materia rasiàl, etnega e relijoxa, co na serie de discriminasion e privileji ca li viòla i artigoli constitutivi.

El profesor Moro el ga ciapà pa leje na consuetùdine ca la viòla la leje e ca pa àni la ga umilià milioni de studinti de tuti i gràdi, omiliàndoli pal solo fàto ca no i savea la lengoa del poder. No inportava sa on Veneto el sa l’Inglexe, le ecoasiòn de 3 gràdo, sa el sa programàr in Basic o C++, l’onega roba ca contava pa far cariera xera saver 4 ache de italiàn, si no te finivi in capanon. Milioni de cariere stroncà, milioni de individui co capasità eliminà e costreti far i laori pi ùmili sol parche no i cognosea Foscolo e Manzoni. El rixultà? El xé ai òci de tuti: corusiòn politega, privileji inverosimili, interfarense de la cexa catolega in politega, militari al poder (carabinieri), colonixasion Mericana, distrusiòn anbientàl, violasiòn dei diriti omàni, rasixmo, ignorànsa, mixeria dilagante e na situasiòn economega esploxiva fruto propio de on sistema educativo ca el ga produxesto idioti solo buni parlar taliàn! La libartà de stanpa inte el stàto taliàn e le libartà economeghe le xè ai liveli pi bàsi del mondo.

Inte le scole de el stàto taliàn i puteli li vien terorixà co li dixe na parola inte la so Lengoa natìva, li vien deridesti, e dopo minasà e ricatà fin ca i riva vargognarse de le so orìjini e finir pa dìrte: “Capisco il dialetto ma non mi viene di parlarlo non so perché”. El parchè, serché de imajinarlo.

El rasixmo el xè fìno, el ga senbianse naturàl, consuetudinarie e el finìse pa deventar endemego fin ai liveli pi alti de poder. In fin dei conti, la italia la ga selesionà na clàse de poder e riprodutori colturàl ca li ga da rimòvar ogni dubio de èsar dei rasisti e nasionalisti. Chi ca xè rasista no se inacorxe mai de èsarlo fin ca on no el ga la forsa e corajo de farghelo capir. Eco parche Moro el me ga festo sospendar do dì. A xe sta omiliante pa sto omo capir dopo 60 ani de sertese ca no el ga el dirito de prevaregàr le libartà individuàl in sto mòdo in nome dele so convinsiòn nasionaliste. Mi a go riscatà chei milioni de Veneti omilià pa 145 ani e ringrasio chi ca me ga dà sta oportunità, xèra òra e sarìa ora ca milioni de Veneti li se levase sù e li dixese bàsta omiliarne, basta torne pal da drìo, xe finìo metarne i pìe sòra. A parlemo na lengoa e no semo dei ignoranti, in Lengoa Veneta a ghemo costruìo ona dele economie pi forti d’Europa e podemo rinomar na storia grànda. E i taliani co la so Lengoa cosa gali festo in 150 ani?

Raffaele Serafini
Veneto Stato – Marostega

If you liked my post, feel free to subscribe to my rss feeds