headermask image

header image

Spread Spagna-Italia

 

Vardar el spread fra obligasioni taliane e todesche no xe el masimo par valutar l’andamento del stato talian. Sto grafico (tólto da lavoce.info) del spread fra obligasioni taliane e spagnole el xe tanto pi indicativo par rendarse conto del dixastro de politega economica fata prima da Berlusconi e deso da Monti.

Femo on sunto de parché xe utile vardar cosa che fa i marcà finansiari:

  • No ghe xe mejo termometro de cosa che decide de far milioni de investitori co miliardi dei propri schei: sto chi xe el marcà.
  • Se lo stato talian ispira manco fiducia de poder ripagar el proprio debito  (i titoli de stato che’l vende), ghe sarà manco investitori disposti a risciar i propi schei co ste obligasioni taliane (i BTP).
  • Se ghe xe manco richiesta par ste obligasioni taliane, le deventa dele patate bolenti, e par vendarle al stato ghe toca ofrir dei rendimenti pi alti par rasicurar del riscio che no le vegnarà ripagà.
  • Pi alto el riscio de scioco, pi alti i interesi promesi par vender sto toco de debito publico che se ciama obligasion, e pi alti i costi da pagar pai conti publici, che a so volta aumenta ncora de pi el riscio de scioco.

Vardar ala difarensa fra interesi de na obligasion decenale taliana co una todesca (el spread), no xe el mejo paragon parché i interesi su na obligasion todesca i se move par altre ragioni de natura globale che centra poco co el stato talian. Par exenpio, se ghe xe riscio che el dolaro se svaluta, tanti investitori i scanpa verso le obligasioni todesche sbasando i interesi todeschi e aumentando el spread rispeto le obligasioni taliane, sensa nesuna colpa de Monti.

Invese, on paragon fra obligasioni spagnole e taliane a xe tanto pi indicativo, dato che i do paexi i xe nte na situasion simile. Dal grafico se nota come che la politega insulsa, de Berlusconi prima e de Monti deso, la vien punia dai marcà. La logica la xe la seguente:

  • I investitori i taca fidarse cronpar titoli de on stato (sbasandone i interesi) se l’economia de sto stato la ga prospetive de cresita, par ver le entrate fiscali necesarie par ripagar el debito ntei ani a venire.
  • Se te deprimi na economia aumentando le tase te stui le prospetive de cresita, e el spread el crese aumentando i costi de mantegner el debito.
  • Berlusconi ga fato cusì: el ga aumentà le tase par far bela figura col bilancio de sto ano, ma stuando le prospetive de cresita i investitori i ga tacà scanpar.
  • E la BCE ghe ga dito: “bravo che te ne ghè scoltà, ma deso no basta mia parché co la recesion che te ghè creà, deso ghe xe na situasion pezo de prima.”
  • Alora riva Monti e cosa falo? Aumenta ncora de pì la presion fiscale, senpre secondo la logica de pensar al bilancio de ancó, pitosto che a incentivar la cresita par sostegner i bilanci futuri.

Parché xe interesante el paragon co la Spagna? Parché anca se in Spagna el Partito Popolare de Mariano Rajoy ga vinto le elesion a novenbre, el novo governo no se indarenta fin a zenaro. Ma anca se no ga posuo far ncora gnente, solo anunciando na politica credibile par la cresita el ga sbasà enormemente el spread, sparagnando tanti pì schei che le manovre sanguinarie de Mario Monti. Rajoy el ga puntà su la cresita, anunciando riforme sul marcà del laoro, e no n’aumento dele tase. Eco parché xe tanto pì inportante crear aspetative de cresita. Deso le obligasioni spagnole le ga dei interesi de 2 punti percentuali pì base de chele taliane. Vol dir on sparagno pai conti publici de decine de miliardi de euro, che xe l’ecuivalente de na manovra sanguinaria de Monti.

Come che insegna libertarianation, no te curi mia na economia sofegà da tase alsando ncora de pì le tase. Mario Monti lo bocemo in economia, ma ghe faremo na statua par ver acelerà la fine moribonda de sto stato italian che deprime el benesere e la felicità de tuti i popoli de sta belisima penixola.

Lodovico Pizzati
Segretario – Veneto Stato

If you liked my post, feel free to subscribe to my rss feeds