headermask image

header image

A Zurigo na mostra so Venesia e Amsterdam

Intel Muxeo Nasionàl Svisaro de Zurigo, uno de i pì inportanti de la Svisara, da el 14 de Setenbre fin al 17 de Febraro de l’ano che vien gh’è na mostra interesante: Capitale. Commercianti a Venezia e Amsterdam. La mostra la varda indrio a la nasita de el sistema capitalistego e ciapa a exenpio do de le pì inportanti cità indove el sistema capitalistego el se ga svilupà, Venesia e Amsterdam apunto.

Pararìa che el spirito de intraprendenza el sipia intel DNA dei Veneti: ancò fà ieri i Veneti i va in volta par el mondo a catarse oportunità e a crearsele da de lori. Pararìa propio che el spirito de indipendenza, che inte la pratega l’è el verghe el mecanismo capitalistego incorporà, el sipia dei Veneti dei ieri e de coei de ancò. Inte la mostra a se vede robe un mucio interesanti, par exenpio libri che i insegna a scrivar in arabo, a far la partita dopia, a far i calcoli aritmetici conplicà co l’aiuta dei déi. Se respira l’aria de intraprendenza in ‘sta mostra e se capise come che Venesia la sipia stada bona de deventar coel che l’è deventà grasie al comercio internasional (globale a coei tenpi).

Sta mostra però l’è anca on monito. Intel dipinto alegà el se vede l’anbasciatore olandexe che l’encontra el Doge e coei de la mostra i lo ga percepìo fà on pasagio de consegne: da la vecia potensa a la nova. Difati dopo l’epopea de splendore, i venesiani i se ga sentà inte le ville palladiane, i ga lasà perdar i comerci e a la fine i se ga trovà irilevanti co Napoleone l’è rivà. L’insegnamento che mi go vuo da sta mostra l’è che el sararse, el far i signoroti e no starghe drio a la novità i te porta a la morte. Senpre tegneserlo inamente e senpre difidar da chi che spua so le libertà de comercio parché in fin dei conti el spua so le libertà tout court.

Par ultimo, lasime dir che el fato che ghe sipia na mostra cusita el vol dir tanto. Mi, che a me piaxe vardar le persone, a me son meso inte on cantón a vardar i zucchini (cusita i vien ciamà, mia masa educatamente, i svisari tedescofoni dai ticinesi) che i vardava estaxià le testimonianze de la civiltà de la nostra capitale storega. Me piaxarìa che ghe fuse piasè consapevoleza de el bagajo storego che gavemo de drio par verghe la forza de far calcosa de novo e de inportante par el nostro futuro.

Luca

If you liked my post, feel free to subscribe to my rss feeds