Bilanci energeteghi par la 
sovranità
Otegner la independensa de on teritorio xe na opara on mucio granda e impegnativa, ca gnanca xe dito posa ver suceso. Le motivasion ca ghe rema contro le xe principalmente do: la eventuale incomprension/opozision de la popolasion ca dovaria partecipare donca el relativo costo in termini de tempo de movar la masa de opinion publica in favore (se mai ghe ne fuse le condision); el costo in termini de forsa se la asion la xe condota in modo unilateral da na elite ca la se impone a testa de la popolasion, anca a despeto ca tale popolasion la sipia rilutante.
A se pol discorar estensivamente par via de i do punti pena mensionà, ma struca struca ala fine cinicamente coeste le xe le opsion in termini realisteghi so la baze de fati dezà capità inte la historia. Perdarse drio altre considerasion xe trar via tempo.
Da on punto de vista etico xe evidente ca la seconda opsion no la xe mia acetabile.
Resta el punto ca par ambo i cazi se ga costi alti.
Da el punto de vista de le razon economeghe de longo periodo de la sielta independentista vien ciaro ca se ga na situasion de paradoso, in cui el costo riscia de eser anca de pì de coel soportà in suditansa. E sti costi i saria soradetuto soportà dai promotori de le inisiative.
Inte la seconda modalità, coela de la forsadura unilateral, i costi i saria dopo ampiamente ripagà, dato ca la elite la gavaria la posibilità de ciaparse dei previlegi e richese, on fià come se fa intei sistemi monarchici.
Par capir mejo sto conceto, femo on paso indrio de siesento àni. Semo intel culmine de el medio evo, e le robe le xe pì semplici da sperimentar mentalmente: On capitan de ventura, co i so cavalieri el ciapa de ocio on teritorio e el decide de stabilirse. Sto teritorio magari el xe dezà inte le man de nantro signoroto, magari on duca. Se insedia na batalia, e in baze ale forse so el campo vinsarà on de le do parte. Metemo el capitan, ca el se proclama sior de la tera. El duca oviamente no el xe lasà al sbando e riva rinforsi invià da el principe o da el re ca el garantiva protesion ale tere dei so duchi. Ma a sto punto el capitan, novo sior, el riese a convinsar altri alearse e el se bate, vinsendo. Xe fata, la tera deventa el novo principà de el novo sior proclamà, e la se definise independente da el reame. I costi xe stà alti. Diversi cavalieri xe restà copà, e anca dei campagnoli ca intanto xera stà aruolà par far da mucio (come i pedoni dei scachi). Cosa gavaria mai fracà sti omeni a far ste asion riscioze? La promesa de el capitan de ventura, autoproclamà sior e sovran, de nominarli so cavalieri, e de posibili espansion co potensial de deventar duchi, o de previlegi de deventar armigeri de el novo principàl, contando anca so la posibilità de derobar el vecio duca de tuti i so valori.
Tornando indrio ai tempi nostri, la situasion no la saria tanto difarente. Coeli ca ciapa on teritorio co la forsa i dopara i medemi metodi de promesa e de recompensa fondà so i previlegi e le roberie. Anca el stato itajan el ga doparà sto sistema co i so dependenti pioveghi: vegnendo fora da la goera civil de el 1943-44 el ga necesità de deventar stabile e par farlo ghe serve on controlo capilar e fidà so tuto el teritorio. Ninte de mejo de crear na masa de persone ca le ga on intarese rento el novo stato e le fasa par poco ca sipia da can da goardia de el sistema. E el metodo de finansiarli xe stà mediante la impozision fiscal, atuà in fondo vardar ben fà na robaria.
A go semplifegà oviamente, ma el sistema xe coelo.
Ma no ve parlo de sta roba par propor simili opsion, ca come a go dito le xe moralmente inacetabili, ma par rendar ciara la vizion e vardar par sora la erba alta de el campo in cui se catemo a caminar.
Drio man sto discorso saria ben anca ciarir cosa xe el senso de sovranità. E lo faso discorendo in termini economeghi. La sovranità vole dir la determinasion direta de le proprie rexorse e de le decizion ca se ciapa, ma anca ca se ciaparà intel futuro. El futuro no el xe paraltro solo coel vostro, ma dei vostri fioj e dei disendenti. Insoma la coestion economega la ciapa dimension cumulative intel tempo co proporsion considerevoli.
Deso pensé al vostro stipendio. Se valtri tiré €15000 al àno ma ghe ne lasé dozo altretanti de tase, pì par ogni roba ca paghé ghe ne lasé dozo el 20% (la IVA ve recordo el se inflasiona co i vari pasaj de el bene su par la cadena de la distribusion, paraltro), capiré ca in 40 àni de lavoro ve sì magnà fora almanco €660000 (sensa contar la inflasion so i skei e ulteriori tase ca periodicamente se và pagar, incluzo coele straordinarie, come le sucesion). Coesto costo lo dovaré moltiplegar par el numaro de fioj e par i àni de lavoro ca i farà anca luri, e se vede ca in do-tri generasion la cifra la deventa estremamente importante.
Podelo on sovran evitar sti costi? No del tuto, ma le robe le cambia notevolmente. Basta vivar in stati come la Svisara, par exempio, par ver dezà na situasion on mucio mejo da on punto de vista de cumulasion de skei intel tempo.
Coel ca cambia soradetuto le xe le asion economeghe ca se pol far, in termini imprenditoriali, regola ca la vale par tuti (no sto difati fazendo on discorso imprenditori/dependenti).
Fate ste considerasion dovaria eser ciaro el groso utile de eser sovrani. Quanti capirà sta dinamica? Mi no credo tanti. Ma on fià si. El me discorso el xe par sti ultimi.
Serve cosa perdar tempo drio movar la testa dei suconi? Si, a xe justo e anca moralmente ireprensibile, provar slongar na man, ma se el sucon no la vol tor su saria stupido insistar.
Ma alora, existe na alternativa a le do opsion cità verzendo el articolo? Mi sujeriso sta considerasion. Se coela elite ca voleva agir co determinasion, invese de agir unilateralmente par sora de nantra popolasion contraria, la se concentrase formando ela istesa na popolasion, in sto cazo tale popolasion la saria favorevole, e la saria al tempo isteso in acordo par la so sovranità.
Altri grupi humani ga festo ste sielte intel pasà. Alcuni optando par deventar nuclei autonomi rento le società, come pol eser i ebrei inte la società americana e in genere intel mondo, o altri nuclei ca i se ga postà in modi pì subdoli e i agise dadrio le quinte, ma altri ancora definendo on teritorio de referimento sensa star de scondon, ca la xe forse la opsion pì seria, onesta e co potensiali ciari par el futuro.
Donca no el xe el grupo elitario ca da rento na società (magari contraria) el forsa la man, ma el xe elo ca el “exilia” e el se insedia so on spasio suo, i cui termini de independensa i evolvarà.
El xe on rajonamento par coeli ca capise sta dinamica, destinà a iluminà orientà a vardar al futuro no solo de la so vita ma de le vite ca vegnarà, inte on pato de fiducia se ga da formar on cordon de colaborasion par el svilupo de on projeto de longo termine, chieto, dato ca se và par mari de cui no se ga carte e no se sa ndo se và aprodar.
Parlavo de coestion economeghe, ma no xe importante la richesa imedià ma coela potensial ca se construise. Gavemo on insegnamento: Venesia la xe deventà de oro, la lo ga inmucià su partindo in umiltà da cazoni so el paltan de la laguna.
El human dopotuto no el xe felice parché el ga el makinon o el vilon o on milion in banca, ma par i afèti de la fameja, par star ben inte on posto, sentirse amà, e sentirse utile, e par magnar ben e far mestieri pì intimi. Coesto el xe el objetivo primario minimo, e no el dovaria eser masa difisile da otenjer inte on spasio proprio.
Cosa alora pensar de on projeto ca el esplora le posibilità de on stato libaro de cui eser sovrani? Drio eser pionieri de na idea nova ma al tempo isteso antica?
Claudio G.
Popularity: 32% [?]
