Ancó ghe xe sta acoa alta record a Venesia: +1.58 metri rispeto al livelo de marea media. Do sentimetri de pì del 2003, el liveło pì alto dei ultimi 30 ani. Venesiani co stivałi da pesca, e turisti co sporte de plastegà ligà su pai gałoni, i se movéva su e xo par łe całi come ogni altro dì. I xera tuti stravià da sto perfect storm de (i) na scravasada de piova ła sera prima; (ii) vento de siròco; e (iii) na alta marea da luna piena.
Intanto nte ła laguna obligasionaria dei marcà finansiari, anca l’Italia ła ga fato record. Ancó łe obligasioni a diexe ani del stato talian łe paga on interese de 1.38% de pì dei bunds todeski. In teoria obligasioni todeske e taliane łe dovaria dar i stesi interesi parké tute do vałutà in euro. Difati xe stà presapoco cusì in tuti sti ani de union monetaria, ma dèso a xe rivà on perfect storm finansiario: (i) on liveło stratosferico de debito talian; (ii) ła crixi finansiaria ke metarà a riscio i stati pì indebità; e (iii) na recesion economica de proporsion epocałe.
L’acoa a Venesia ła xe xà ndà xó, i botegari i ga finìo de spasàr fora l’acoa, e deso i sèvita far afari coi turisti. Invese par l’Italia xe almanco do mexi ke el diferensiałe el xe stabiłe al de sora de +1%. Ntel 2009 l’Italia ła ga da catar cronpadori par sentenari de miliardi de debito publico. A on liveło de interese cusì elevà, vol dir pagar diexene de miliardi in pì, cusì, sensa ke el governo el fasa gninte de particołare. Sofegà dai interesi del debito, e stuà da manco entrate fiscałi, forse el 2009-2010 darà el colpo de grasia.
A naltri veneti no ne resta altro ke ciapar in man łe nostre scóe, parké pa’l 2011 ne tocarà spasar fora łe scoase łasà da 145 ani de alta marea taliana.
Lodovico Pizzati
Popularity: 1% [?]
