[Link ala prima parte]
[Link ala seconda parte]
Intanto prima de tuto, femo ciaro so na distinsion fra crixi economega e crixi finansiaria.
Crixi economega ła xe ła recesion ke ła xe drio rivar, e ke ła saria rivà anca sensa na crixi finansiaria par sora. Eco i motivi:
i) Primo ghe xe on declino struturałe de l’economia taliana rispeto a altre economie europee. Ła raxon xe l’ineficensa del contenitor Italia, el sófego fiscałe, el sistema legałe poco lubrifegà, i dixincentivi perversi contro el sviłupo e l’investimento, e tante altre brute robe ke ne toca supar su soto el taco talian.
ii) Secondo ghe xe ła recesion ciclica dovùa anca a on cało economego in Usa ke ła xe ncora l’economia pi granda del pianeta tera, e pena ke i perde colpi ne risentimo tuti.
iii) Terso ghe xe l’euro masa forte (a parte ła rimonta del $ in sto ultimo mexe) ke rende i nostri prodoti masa costoxi ntel marcà globałe.
iv) e Cuarto ghe xe ła conpetision axiatega ke ła xe drio coparne. Ma kive xe in parte colpa nostra ke gavemo da diversificarse e far pi roba de alta tenołogia invese ke tesiłe, scarpe… (basa tenołogia).
Crixi finansiaria ła xe sto cołaso del sistema bancario in parte cauxà dałe ragioni ke ve go contà in te ła prima puntata. In poke parołe se trata de łe banke ke ga i conti sbolsi, e łe ga mołà de farse prestiti parké no sa ki ke xe el prosimo a far scioco, anca par via ke no ghe xe masa trasparensa (ke dovaria esarghe) de come ke i xe mesi sti benedeti biłanci.
Ma ki ke ve conta ke “i sacrifici” venturi i xe colpa de sta crixi finansiaria a xe drio cojonarve.
Su sta crixi finansiaria mi no vedo sta situasion catastrofica come ke i ne vol far credar. Xe vero ke na industria bancaria funsionante ła xe inportante par na economia globałe e sofistegà, ma se i taca mołarghe de far prestiti xe anca sintomo ke ghe xe necesità de no farli. Par exenpio, eco el senario da film horror ke i ve descrive: łe banke łe moła de far prestiti se ve serve on mutuo o pì spasio nte na carta de credito, o no ghe da credito a na dita par pagar i operai. Ma el problema ke ga cauxà tuto sto anbaradan no xera proprio ke ste banke łe gavéa fato prestiti co masa ałegria? Ełora a l’indoman de na inbriagada, co ke tute ste banke łe ga on mal de testa ke mai, ła cura saria darghe credito ilimità? Go capìo ke se te vè vanti bévar anca de matina te pasa el mal de testa, ma te resti n’alcołixà. O no?
Zero al totocalcio
Eco ke nte łe prime setimane de Setenbre se vede el ministro del texoro merican, Paulson, co on fare disperà a pregarne de evitar ła fine del mondo dandoghe in man $700 miliardi. Salta fora anca Bush, “rasicuràndone” ke i nosti conti in banca i xe al sicuro, ma co ła so facia da intełetuałe el ga semenà ncora pì panego. I xera drio far presion parké el congreso merican el ghe dase na cifra mai vista prima sensa dir ai ne bai.
Ma ki xe ke gavéa tirà fora sta cifra? Co ke calcoło? Dove xerełe łe anałixi ke ne descriveva ła catastrofe iminente? Ste kive łe xera łe domande ke se ga fato sentenari de economisti de NYU, Chicago, esetara. Ma se no ghe xe ciaro a profesori de materie finansiarie, parké dovaria capirlo na mànega de połitici? Ełora me go domandà: vuto védar? Vuto védar ke el sior Bush el xe drio pensar ała so legacy?
Xa el se ga asicurà el titoło de pexo presidente deła storia mericana. Deso el xe in conpetision co se steso, parké podaria saltar fora nantro presidente fra on secoło o do, ke xe ncora pexo de łu. Ełora el xe łi ke se da da far. Ciò, no xe mia fasiłe far zero al totocalcio. E ciavar $700 miliardi (el 5% del Pil merican, o el 40% del Pil talian) xe na beła maniera de concluder ła so presidensa in bełésa.
Ste tenti ałe obligasioni
El 99% de l’atension academega e mediatega ła xe drio concentrarse sul suceso de sta manovra da $700 miliardi, e su ła sociałixasion del sistema bancario in ato in Europa. In efeti, ghe xe propi da domandarseło, dato ke i vol incaricar de gestir sti $700miliardi de skei pioveghi propi l’ex cao deła Lehman Brothers (ndà in małora parké i asicurava sporte pien de pomi smarsi…vedi prima puntata).
No vojo mia minimixar l’inportansa de evitar na crixi bancaria, e se i ghe moła al Fondo Monetario de far riunioni de G7, de G20, e de Gin, forse forse i ghe ła fa a salvar ła baraca. Ma cuel ca me preocupa xe ke nisuni pensa ała conseguense indirete. Pénsełi davero ke dar licuidità sensa limiti no gavarà efeti secondari? I governi i ga dito ałe banke ke ła tipografia ła xe verta 24ore al di. Se ghe serve skei, łori i xe pronti stanparli (no ocorarà leteralmente stanpar skei, ma i xe pronti a far “prestiti” fin ke i vol).
Ałora, femo do calcołi de presia:
1. I Usa no i ga intension de finansiar sti $700 miliardi tasando i mericani, ma i domandarà on prestito butando ntel marcà obligasionałe na fraca de Bot mericani, ciuciando su el groso del credito mondiałe.
2. Soło a l’idea, i flusi de capitałe i xe ndà verso ła Merica (eco parké el $ se ga vałutà). Ma no ghe xe na risorsa iłimità de credito mondiałe, e tuti i debitori (fra cui l’Italia par prima) ghe tocarà conpeter alsando i tasi de interese da pagar a ki ke xe disposto cronpar el so debito. Fè conto ke soło a l’idea, ła difarensa de interesi sui Bot fra Italia e Dhermania ła xe saltà su de 1% (imaginemose co ke sti stati i sèvita indebitarse par far fronte ała crixi d’astinensa bancaria).
3. Deso rendémose conto ke ogni aumento de 1% de taso de interese ghe costa 10 miliardi de euro al stato talian. E cioè on aumento del deficit de altri 10 miliardi, cusì, sensa ke el governo el fasa gninte de małe.
4. Fin a ke punto xełi boni de indebitarse? I pì veci se ricordarà ke l’Italia na olta ła dava anca interesi a do cifre su i so Bot, ma ła difarensa xe ke na ‘olta i te pagava in lire, ke łe vegneva svałutà in alegria. Ma dèso co l’euro no i pol pì.
Eco parké mi ve consilio de star tenti a no cascarghe co ke i ve ofrirà obligasioni (“sicurissime!”) ke ve da tasi de interese “masa” alti. Magari Bots todeski o anca de l’Est europeo (ke xe paexi poco indebità) ok, ma stè veramente atenti a Bot de paexi stra-indebità (Italia, Grecia, Belgio), o a fondi de obligasioni dove no se capìse ben ke obligasion i xe drio cronpar.
Lodovico Pizzati
PNV
[Link ala prima parte]
[Link ala seconda parte]
Popularity: 1% [?]
