El Partito Nasional Veneto el esprime el so gran cordolio par la morte inprovixa e “strana” de Jörg Haider e inte sto momento triste el xe visin ai so familiari e ai fradei Carinsiani, Striaki e a tuti i Miteleuropei che in lu i vedea un omo de speransa pal futuro, come un mucio anca tra naltri Veneti. Jörg Haider sarà infati ricordà anca come un gran amigo de tuto el Popoło Veneto.
Nel’atexa ke vegna fato ciaro sułe cauxe dela so morte, el nostro ricordo va anca a tute łe morti “strane” che gà coinvolto proprio l’area deła Miteleuropa.
Come no pensar infati a Giorgio Panto, o a Toni Bisaglia?
Par un strano destin, i leader połitisi pì inportanti de ste parti e al sentro de svolte epocałi che łe podeva canbiar i equilibri e i raporti de forsa generałi i xe tuti morti par insidenti “particołari”.
Abiłi piloti de machina, de elicotero, de barca che i xe tuti sconparsi in modo poco ciaro, ki sorpasando a alta vełosità, ki dixintegrando anca ła pała del so elicotero, ki sbrisiando su un toco de saòn…
Anca pa sto motivo naltri Veneti a dovemo canbiar strategia e costruir na rete de omeni ke no i sipia insostituibiłi. E dovemo farlo in presia, prima che sipia masa tardi.
A ogni modo el momento el xe crucial par el nostro destin de Popołi deła Miteleuropa.
El masimo ło vedemo ki da naltri, ndoe ke el aiuto de stato ke vegnarà dato ałe banke filo-tałiane el farà na concorensa sleal al nostro sistema bancario veneto, ma anca a queło striako, o alpin in general, che’l xe sano e ancorà a na economia vera, anca se in forte crixi a cauxa del’ingabiamento in sistemi statali sentrałisti e ladri dełe nostre risorse. Anca co sto aiuto de stato łe robe no podarà migliorar, ma ansi in uno-do ani podaremo ndar rento a na probabiłe era de iperinflasion, se i G7 i desidarà de inondarne de skei stanpai in freta e furia nei prosimi dì, pur de mantegner sułe careghete i so amisi finansiatori. Insoma diventaremo forse na gigantesca Republica de Weimar.
Sto canbio epocal de sistema economego el ne ciaparà in pien, in particołar naltri Veneti, ma anca apunto i Striaki, i Furlani, i Tirołexi, i Triestini, i Sloveni, forsa anca i Sviseri, anca se łori xe mesi un s-ciantin mejo.
Ki naltri ghemo ancora na bona baxe de cultura popołar e de capasità de crear na rete de risposta anca ai fenomeni de congiuntura negativa.
Jörg Haider ste robe łe saveva e łe gavea capìe prima dei altri e el sistema sentrałistego Striako e Europeo ghe ne gavea na paura orba. Forse Jörg Haider el sarà anca morto “stranamente”, ma łe so idee łe vinsarà come prima, ansi pì de prima.
Tschüß Jörg, amigo del Popoło Veneto. Ripoxa in paxe, el futuro te darà raxon.
Gianluca Busato
Partito Nasional Veneto
Popularity: 1% [?]
