headermask image

header image

La nostra forsa

la-nostra-forsaNa roba che la me piaxe del Pnv l’è la so forsa argomentativa. Nialtri no ciacolemo mia a vanvera, par darghe on canbio de aria a la boca, fà i politici italiani, italo-padani o italo-veneti. Nialtri argomentemo e nemo vanti par rajonamenti che i’è baxà de sora a l’inteleto. No proclami, no slogan falsi, no strucamenti de oci ai pexo istinti umani tanto par catàr su voti. L’onestà inteletual, la voja de far, el discorar co el sorixo e mai incagnii e, sora de tuto, la forsa granda de le nostre idee le xe el nostro bilieto da vixita; bilieto che, staxì serti, no’l deventerà mai on “papello”.

El ga dito ben el prexidente Lodovico Pizzati: “L’indipendensa a xe no stroxo a senso unico. Na volta verti i òci verso l’indipendensa nisuni torna indrio”. L’è propio vera, la ga dito propio justa. Co te verxi i òci e te capisi che voler rivàr a esar libari no l’è niente de nefando e no l’è gnanca da egoisti, te se ga verto la via. El Pnv l’è machina ndo te ghe da salir par ndar sparai verso sta via de l’independensa. I nostri argomenti, i argomenti de l’independensa, no i ga paura de niente. No i pol esar afondà parché i xe baxa sora l’aspirasion lejitima e sacrosanta de un popolo de un teritorio che el vol esar da novo independente par via emocratega: dixime vialtri ndo che la dovarìa star la mostruosità.

Sta stimana a me son trovà in na discusion via internet co on me amigo napoletan che el comentava el obietivo de el Pnv de rivar a l’indipendensa. No l’era mia contro par principio, ma in pradega el dixea che a la fine de la fiera, l’era na question de schei. I se ga xontà tanti altri comentatori e el suco el jera senpre coelo: “semo tuti uguali”, “semo tuti italiani”, “parché dividarse?”, “vardè che dopo a starì pexo” (uno el me ga dito cusita!!), “sforseve par far ndar mejo l’Italia e no staxì a pensar a ste utopie” etc etc. La discusion la se ga mantegnù so on registro cordiale e pacifico e mi a go spiegò le nostre raxoni. A go dito luri che el pexo de on citadin de on Stato de sinque milioni de persone l’è on fraco pì pexante de uno rento on Stato de siesanta milioni de persone (cioè, a podaresimo far democrasia direta piasè che in Svisara), che la storia de la Venetia l’è na storia de independensa e de cultura original, che la voja de esar libari no inplica nisuna idea rasista, che semo on partito moderno e verto. Me son inpuntà a spiegarghe che la sarà anca na question de schei (a ghe mancarìa!) ma che strenxerla solo a na question de schei a vol dir no farghe justisia. L’è voja de vivar rento on Stato eficiente, on Stato che no se conporta mia da canaja che te stofega co te te movi. L’è voja de verghe on sistema politico pì visin al citadin, on sistema politico che no’l xe mia sentìo lontan e foresto. L’è voja de verghe la posibilità de vardar co speransa al futuro parché a savemo ben che a star inte lo Stato italiano a semo drio ndar longo na via in disesa che la ne porta verso la mixeria nera. L’istesa mixeria nera che l’è rivà co i Savoia dopo el plebiscito-trufa del 1866. Insoma, l’è voja de verghe on futuro.

Tanti comenti i’è sta scriti, ma, a lexarli, nisun el me ga savuo dir, in pradega, parché se co on referendum i Veneti i voterà par deventar independenti, no dovarìa mia nasar na Venetia libara. La forsa dei nosti argomenti l’è la nostra arma che spara ancò e spara diman, a la fine la colpirà tuti i Veneti. I stesi Veneti che deso i me par on fià indormesà a spetar el miracolo dal cielo par pasar la crixi. Co i capirà che la libartà no i ne la regala nisuni ma gavemo da conquistarla nialti par nialtri, la via par l’independensa la sarà na voltarela, na caminada de salute. Spara ancò e spara diman, a no restarà pì in piè gnanca on luogo comun italiota.

Luca Schenato
Pnv Verona

If you liked my post, feel free to subscribe to my rss feeds

Money Making Options

Post meta

This entry was written by giane and posted on Ottobre 22, 2009 at 4:48 pm and filed under editoriali, elezioni in Veneto, lettere, temi veneti. Bookmark the permalink. Follow any comments here with the RSS feed for this post. Both comments and trackbacks are currently closed.

Share with others

Post La nostra forsa to digg. Post La nostra forsa to Reddit add to stumbleupon Google Bookmark myweb bookmark on del.cio.us newsvine Tailrank magnolia Furl co.mments shadows simpy blinklist