PLEBISCITO.EU | PNV. Press News Veneto

El PNV sotolinea senpre i vantagi economici de ver no stato veneto. Tanti pultropo i asocia sto dexiderio de indipendensa come na forma de egoismo. I crede che el stato talian no’l sipia altro che na formula contabiłe a soma zero. Come discuso in staltro articoło, ogni ano i veneti i paga almanco 20 miliardi de tase in pì rispeto i servisi che i riceve (ogni ano €4000 de tase in pì a testa). Na volta indipendenti vorà dir che calcheduni xo par ła penixoła italica gavarà 20 miliardi de “servisi” (par modo de dir) in manco. Come farałi poareti? In sto articoło Luca ne spiega che tanti veneti, siando ła popołasion pì propensa al vołontariato e ałe donasion de sangoe, i se fa dei problemi de cosiensa.

Anca naltri del PNV semo altruisti, e se rendemo conto che el benesere de no stato el se baxa sul benesere de tuti i stati che ghe stà intorno. Però semo persone rasionałi e se baxemo su fati e no su loghi comuni. Vardando i dati vedemo che el stato talian no xe na formuła contabiłe a soma zero, ma on sistema de gestion ineficente de risorse. Sensa Italia anca i siciliani i staria mejo. Parché? Vardemo i fati de deceni de asistensiałismo.

Sto grafico rafigura tuti i dati par la Sicilia che i xe stà tólti dai Conti Pubblici Territoriali del Ministero del Tesoro. Tase e servizi i aumenta parchè i xe dati nominałi (co rento l’efeto inflasion), ma stà de fato che ła Sicilia ła riceve regolarmente almanco diexe miliardi de servisi in pì rispeto łe tase che ła paga (riga verde). L’ultimo dato del 2007 xe de €12 miliardi, che pai 5037799 siciliani (dati Istat) vol dir €2396 de servizi susidià (pagà da naltri) par ogni singoło sicilian.

Deso, va ben sentirse altruisti e caritevołi, ma 2400 pałanche una sora staltra (200 franchi al mexe a ogni sicilian) forse a xe on fià masa. Ma ła mixericordia de alcuni veneti no ga limiti e saria pecà cavarghe na cuciarà de caviałe dała boca a on bocia sìcuło. Ałora gavemo da dimandarse: sto fluso continuo de susidi xeło on bene o on małe par una dełe regioni pì poarete d’Europa? Semo drio darghe na man, o semo drio soministrar eroina a on sistema smarso? No parché ghe xe anca chi che crede che gavemo l’obligo morałe de susidiar na regione in periferia d’Europa, che no gà łe stese oportunità economiche de naltri veneti, che se catemo al centro dei scanbi comerciałi europei.

Ałora femo on bel paragon co naltra ixoła in periferia d’Europa. Na ixoła in mexo al Mediteraneo, ncora pì distante deła Sicilia e co ncora manco oportunità e risorse naturałi. Paragonemo ła Sicilia co Cipro.



Sto grafico, tólto da dati Eurostat, rafigura el redito pro capite rispeto ła media europea. Vedemo che Cipro crese de pì deła media, mentre ła Sicilia ła crese manco deła media, e a furia de susidi mixericordioxi ła xe drio deventar senpre pì poareta.

Forse no ghe demo bastansa schei? €2400 a testa no i basta mia? Cuanto ghe dàghełi ai ciprioti parché i cresa cusì? Xe vero che Cipro riseve cuatro fregołe de fondi europei, ma no tanto cuanto ła Sicilia. Ełora che formuła magica gałi? Chi xełi i loro benefatori? La risposta xe che Cipro ga ła fortuna de eser no stato indipendente. No i xe mia sucubi come i siciliani de no stato sproporsionà cofà l’Italia. La Sicilia ła xe in periferia del stato talian, e par cuesto ła subise na politega centralista. Cipro ła xe al centro de Cipro, e i ciprioti i xe łibari de far ła połitega che mejo ghe comoda par el loro benesere.

Come ła Sicilia, Cipro el ga el potensiałe turistico. Ma a difarensa deła Sicilia, Cipro no ga so ła gropa l’Alitalia, no i ga da subir el monopolio de trasporti de na dita de “bandiera”. Par on veneto costa de manco nar in ferie a Cipro che a Jexoło, propi parché i xe sta boni de far na połitega par facilitar i turisti a nar fin là. Oltre el turismo i ciprioti i ga anca faciłità i investimenti, e podendo far manco presion fiscałe sui propri citadini i xe sta boni de far partir on ciclo virtuoxo. Paragonemo ła presion fiscałe in Sicilia e a Cipro:

Cipro xe no stato indipendente, e xe libero de sbasarse łe tase. Ła Sicilia no ła gà sta oportunità, e i so citadini i gà da pagar tase alte come el resto dei taliani. Dopo sti schei i ghe torna indrio, ma par rivedarli on singoło citadin ghe toca metarse in fiła ntel sistema clientełare. Eco parché co sto sistema Italia el disincentiva ła cresita. Ałora deventando naltri veneti indipendenti ghe demo na man anca a lori a destrigarse da ste caene de asistensiałismo, cusì i gavarà anca łori l’oportunità de far ła so połitega indipendente e creser anca de pi dei ciprioti. E ricordemose che prima de l’unità d’Italia ła mafia no ła ghe xera mia.

Lodovico Pizzati
Presidente – PNV