Ła bandiera del’indipendensa ła xe pena stà alsada

So pena tornà da un studio tełevixivo ndoe che me parea de esar un ospite de stranio. Gò fato el me unico intervento in veneto prima de łasarghe spasio al bravo Gianluca Panto e subito dopo me son rexo conto che i raprexentanti de st’altri partiti i gera morti che parlava, anca se mi raprexentavo el partito ke gavea ciapà manco voti de tuti.

Sì, el fato xe ke anca dopo łe votasion i gera drio continuar a far canpagna eletoral.

Ma cuel che no capiso xe come ke deso i podarà risolvar i problemi dei veneti, xogando al tavoło trucà ndoe ke comanda el croupier tałian, kel se magna łe nostre fiches una drio st’altra, sensa ke se n’acorxemo.

Semo ancora su na faxe ndoe i veneti i vota el partito pì forte. Xe giusto ke sia cusì. Avegneva anca cualke àno fa, coła Democrasia Cristiana, e dopo da un dì a st’altro ła xe finìa in presia, come ke savemo. Ki gavarìa mai dito ke ła DC podese sparir dała siena politica in un per de àni?

Naltri dovemo tegner duro, dovemo tegner alta ła bandiera del’indipendensa. No mołar, magari ciapar respiro se serve, giustar la strategia, catar idee nove, coinvolgiar senpre pì veneti, ma mai mołar.

Ovio ke ghe sipia momenti de sconforto dopo un risultato eletoral ke magari cualcun sperava pì alto. Mi no gera tra cuesti, ma ło capiso ben.

Deso l’inportante xe ndar vanti. Naltri savemo ben ke rivarà el momento in cui sta baraca ła vien xò. E co ła vien xò naltri gavemo da esarghe. Se mołemo prima, torna i amisi de sti ki. Se invese tegnemo duro, saremo naltri a ciapar in man el bałin dai veneti.

Deso xe giusto ke Luca Zaia e ła Lega Nord i posa dimostrarghe ai veneti el so vałor. Gera inpensabiłe ke i fuse rivai fin ki sensa ke i ricevese el mandato pien.

Deso toca łori, sensa scuxe.

So ben ke in tanti i dixe ke femo in tenpo a esar morti. Ma alternative no ghe ne xe. L’unica alternativa xe emigrar da sta Italia małedeta. Ma mi preferiso ke a ndar via sia i tałiani, no i veneti.

Vanti cusì, ke semo stai fin masa bravi. Ghemo dato el masimo e da bravi veneti xe cueło ke conta. Co ghemo dato el masimo, podemo ndar in leto contenti, kel nostro dover ło ghemo fato tuto.

Gianluca Busato
Segretario PNV

written by

The author didn‘t add any Information to his profile yet.