PLEBISCITO.EU | PNV. Press News Veneto

A me vien da ridare. On giornae el titola ke on ministro leghista dixe ke ghe voe 12 miliardi de euro par la ricostrusion dopo l’ultimo teremoto e i magistrati, in te lo steso titolo, i dixe: la Mafia xe pronta coi skei!

Vuto vedare, me digo ridendo, ke i ghe xè rivà finalmente, a la solusiòn pì logica: ke saria de molarghela col teatrin de lo Stato da na parte, i criminai organisà da l’altra… A te ghe credi par koalke anno, ma no par 160 anni, no?

Lexo mejo e vedo ke no, no xe mia così, i “lancia l’allarme” come al solito, par “evitare” ke camora e mafia meta la sata ne la torta de la ricostrusion. Ah, eco, digo ben, vanti col teatrin. Al prosimo teremoto verà fora ke la sata i ghe la gavea mesa, ma sarà masa tardi e tuti gavarà desmentegà.

Dopotuto anke mafiosi nostrani come Feliceto Maniero, el boss de la mala del Brenta, par rimanere dae nostre parti, grasie a la colaborasion de lo Stato Italiàn, dopo ke i ga copà, rubà, inbroià, i xe tornà a fare afari, e ke afari, import-export ciò: xè cosa nota.

Ma tornemo a ‘sto poro Sud. Ieri sera a gero al ristorante con ‘na cara amica de Caserta. La fa la maestra ne la provincia campana, zone dure, pericolose, crimine alto, taso de omicidio al masimo sui standard europei. La me dixe ke 50 per cento dei so toseti de le elementari i fa tuti el tifo par Sandokan, el capo camorista de turno. A dire el vero ghe piaxe anka Berlusconi, la me dixe, parké el ga skei e done. Ma tra i do, i preferise Sandokan. Sandokan el camorista vs Berlusconi, bah, saria una bela idea par un carton animato… Ma xe proprio koesto el punto.

Deso ve spiego:
In Campania, l’indoto de la camora, ghe dà da magnare diretamente a 800 mila dipendenti, moltiplicando par tri (na familia media) a se riva a 2 milioni e 400 mila campani ke vive grasie a la mafia (su 6 milioni de abitanti…beh, xe koasi la metà, de novo sto 50 par cento…).
L’amica maestra la me domanda a mi, cosa ke penso ke se pol fare pal Sud. Ghe digo, pensando a ‘sto 50 per cento: gheto mai provà a imaginarte come ke sarìa da voialtri, ne la bela Campania ke mi conoso bastansa ben, sensa lo Stato italian? Cosa sucedarìa in Campania se la fosse indipendente? Davero ghe saria na ditatura camorista come ke pensa un altro amico napoletàn, inteletuale bastansa rispetà per rigore e serietà? Ma se xà la magioransa xe a favore de la camora parkè sarissela na ditatura?
E no xe pitosto ke la camora la esiste e la se ingrassa proprio parkè la esiste in contraposisiòn a lo Stato italian? Ovio, no, certo, infati no lo digo mi, badè ben, lo dixe la Asociasion Industriali Meridioai sul Sole 24 Ore da almeno do ani.

Ghe domando a la maestra: ghe saria un regolamento de conti, na guera civile se la Campania fose indipendente? I me amici campani no i sa rispondareme, i xe sbigotii a l’ipotesi. Sì, me dixe la maestra, ghe xe koalkeduno ne la so fameja ke ghe insegna ai tosèti come ke Garibaldi el ga mandà in balòn la inportante fabrica locae solo parkè la xera dei Borboni…ma xe come una cosa disdicevole, par lori, nonostante la sia la verità…ma eco ke la me amica e so fradeo taka pensarghe.

Mi ve digo ke ghe penso, e pi ke ghe penso pì me vien da credar ke no go mia da esare del tuto mato. O almanco, par citare l’Anonima, sì, ma Magnagati: vardando in giro, on poco me consolo, sarò anca mona, però no son da solo.

Gustavo Dal Lago