PLEBISCITO.EU | PNV. Press News Veneto

Ona de le robe ca de le volte se sente dir in volta da persone ca ga na informasion storega superficial dà da la retorica unionista e da la scòla, ca la se baxa so testi scriti so coela istesa retorica, a xe ca se gavaria da recordar i tanti ca xe morti e ga patio par la unità de Itaja.
Purtropo tuto coesto el se fonda so on falso storego, de cui par deso solo taluni storeghi stà urtando alché vegna fora la vèrità, ca la ne conta tuta nantra storia. Invèro i itajani soto i Savoja i ga festo na ocupasion par ninte diversa de coela ca ghe xera co Ostriaci, co la difarensa ca sti ultimi (in termini de tempo) no solo xera visti co sospeto ancor prima de intrar inte le tere venète (le bataje de Custoza e Lissa le xe stà vinte al sigo de Viva San Marco) ma soradetuto dopo i se ga confermà dei predatori e basta. Xe la epoca ndo nase filastroche[1] ca le ne dixe ciaro co la semplicità del popolo come le ndava le robe. Co sciopa la prima goera el teritorio ben controlà da la polisia militar dei Savoja (i Carabinieri), xe stà fati rastrelamenti par ciapar su i zovine e mandarli combater contro la so volontà (nando caxa torli), par pararli combater e morir, vera carne da macelo: dandoghe poca atrezadura (de modo de mantegnerli doxo par prevenir risci de rivolte), doparando i carabinieri (ben atrezà e armà) a le spale par fuxilar coeli ca scampava da la linea de combatimento, faxendo asion de teror come la decimasion imposta da el criminal generale Cadorna[2], dandoghe le arme solo co i nava in combatimento e cavandoghele dopo, sempre par paura de rivolte.
Sciavi mandà morir.
E coesti saria morti e se saria sacrificà par la unità de Italia? Par piaxer, no stemo zontar a el dàno la bèfa! Ste persone de securo no le voleva nar morir e combater par na roba de cui luri no saveva ninte e no ghe intaresava. A coel tempo luri conoseva solo la Venetia, i gaveva ancora el recordo vivo de la Serenissima (come gavemo ancora uncò, figuremose alora) e de sta Itaja no i ghe ne saveva ninte, e gnanca capiva la lengoa (ca recordo mi isteso tantisima zente faxeva fadiga capir ancora solo quaranta àni fa).
Dar reconosimento a sti caduti par la unità de Itaja no xe solo on falso storego, ma xe anca na grave ofèxa a la so memoria, xe come se se volese onorar i caduti irakeni ca xe morti par la “esportasion de la democrasia” a sòn de bombe dai F16 mericani!
In vèrità se podemo far coalcosa par onorar la memoria de sti pori toxati trucidà par intaresi meschini de la cerchia dei Savoja e de piemontixi in genere, coalke itajan e i soliti colaborasionisti (anca veneti) ca se cata sempre in tuti i caxi de sto tipo, a xe proprio coela de revendicar la patria da cui i vegneva, la Venetia, e de cui nantri semo eredi, almanco faxendo in modo ca i Veneti posa esprimarse co on referendum e ridarghe la parola se dal bon i vol star rento sta Itaja ca da 141 àni la ne ga solo portà desgrasia, soferensa e furto.
La independensa par ridar, almanco in memoria, la libartà a coeli ca xera stà rexi sciavi par combater e morir contro la so volontà.

E a coeli ca parla de “morti par la unità de Itaja”, a xe mejo ca i ghe la mòla, parché coesto el xe el pèzo insulto ca se posa farghe a la memoria de ste pore Persone.

Claudio G.

[1] “co ghe xera Venesia se disnava e se cenava, co francexi brava zente se disnava solamente, co Lorena se magnava solo a cena, co Savoja de magnar ti ga voja”; “porca italia nemo via!”; e el notisimo “roso bianco verde, color de le tre merde, color dei panexei, la caca dei butei”.

[2] La decimasion la ga intaresà in modo eclatante la “brigata Catanzaro” ca la xera formà in majoransa da Calabrixi. Anca luri, come i Veneti, i xera stà ciapà de forsa e portà combater e morir in posti distantisimi, ca gnanca i conoseva, anca luri voleva la unità de na roba ca squaxi gnanca i saveva ca la existeva?